is zamane mein hai har shaKHs ko duniya ki talash

is zamāne meñ hai har shaḳhs ko duniyā kī talāsh

bas ġhanīmat hai jise kuchh bhī ho uqbā kī talāsh

māldāroñ ko ziyāda hai tama.a duniyā kī

mard-e-muhtāj ko hai roz-e-fardā kī talāsh

gazī-o-gāḌhā ġharīboñ ko hai matlūb-e-libās

nāzuk-andāmoñ ko hai jāma-e-zebā kī talāsh

kHilat-e-fākHirā lailā pe sazā-vār rahe

us ke majnūñ ko to hai dāman-e-sahrā kī talāsh

mārtā hai vahī āshiq ko jilātā hai vahī

yaar ke hote kare kaun masīhā kī talāsh

gudḌī-posh us ko na kah hai vo libāsī darvesh

jo gadā hoke kare atlas-o-duniyā kī talāsh

is jahāñ meñ na koī hogā talab se ḳhālī

kahīñ a.alā kī talab hai kahīñ adnā kī talāsh

zāhid allāh se Dar da'vat-e-asmā na kar

chāhiye shām-o-sahar tujh ko musammā kī talāsh

fil-haqīqat meñ ye sab nafs ke bande haiñ 'turāb'

banda-e-haq hai vahī jis ko hai maulā kī talāsh

is zamane mein hai har shaKHs ko duniya ki talash

bas ghanimat hai jise kuchh bhi ho uqba ki talash

maldaron ko ziyaada hai tama duniya ki

mard-e-muhtaj ko hai roz-e-farda ki talash

gazi-o-gaDha gharibon ko hai matlub-e-libas

nazuk-andamon ko hai jama-e-zeba ki talash

kHilat-e-fakHira laila pe saza-war rahe

us ke majnun ko to hai daman-e-sahra ki talash

marta hai wahi aashiq ko jilata hai wahi

yar ke hote kare kaun masiha ki talash

gudDi-posh us ko na kah hai wo libasi darwesh

jo gada hoke kare atlas-o-duniya ki talash

is jahan mein na koi hoga talab se KHali

kahin aala ki talab hai kahin adna ki talash

zahid allah se Dar da'wat-e-asma na kar

chahiye sham-o-sahar tujh ko musamma ki talash

fil-haqiqat mein ye sab nafs ke bande hain 'turab'

banda-e-haq hai wahi jis ko hai maula ki talash