اس زمانے میں ہے ہر شخص کو دنیا کی تلاش

اس زمانے میں ہے ہر شخص کو دنیا کی تلاش

بس غنیمت ہے جسے کچھ بھی ہو عقبیٰ کی تلاش

مالداروں کو زیادہ ہے طمع دنیا کی

مرد محتاج کو ہے روز فردا کی تلاش

گزی و گاڑھا غریبوں کو ہے مطلوب لباس

نازک انداموں کو ہے جامۂ زیبا کی تلاش

خلعت فاخرہ لیلیٰ پہ سزاوار رہے

اس کے مجنوں کو تو ہے دامن صحرا کی تلاش

مارتا ہے وہی عاشق کو جلاتا ہے وہی

یار کے ہوتے کرے کون مسیحا کی تلاش

گدڑی پوش اس کو نہ کہہ ہے وہ لباسی درویش

جو گدا ہوکے کرے اطلس و دنیا کی تلاش

اس جہاں میں نہ کوئی ہوگا طلب سے خالی

کہیں اعلیٰ کی طلب ہے کہیں ادنیٰ کی تلاش

زاہد اللہ سے ڈر دعوت اسما نہ کر

چاہیے شام و سحر تجھ کو مسمیٰ کی تلاش

فی الحقیقت میں یہ سب نفس کے بندے ہیں ترابؔ

بندہ حق ہے وہی جس کو ہے مولیٰ کی تلاش