ishq mein haal-e-jahan naua-e-digar hone laga

ishq meñ hāl-e-jahāñ naua-e-digar hone lagā

ai parī dīvāna tujh par har bashar hone lagā

husn se āgāh ab vo be-ḳhabar hone lagā

ā.īna jo us ko manzūr-e-nazar hone lagā

raounaq-afzā bām-par vo beshtar hone lagā

band maare bhiiḌ ke ab rahguzar hone lagā

gosh-zad jis ke huā sar-gashtaqī kā merī haal

uñgliyāñ kānoñ meñ diiñ daurān-e-sar hone lagā

ik na ik iizā rahī har dam badaulat ishq ke

dard-e-dil achchhā huā dard-e-jigar hone lagā

vasl kī shab ho chukī paidā hue āsār-e-sub.h

paar dil ke nāla-e-murġh-e-sahar hone lagā

jis ne motī gosh meñ dekhā tire kahne lagā

hai tamāshā kaan se paidā guhar hone lagā

mai-kashī mauqūf jām-o-shīshā rakh bālā-e-tāq

rañg -e-mahfil sāqiyā nau-e- digar hone lagā

rū-e-anvar par huā āġhāz ḳhatt-e-rū-siyāh

ye baḌā andher ai rashk-e-qamar hone lagā

mere marne kī jo dī us huur ko jā kar ḳhabar

sunte hī irshād finnār-o-saqar hone lagā

jhūlne ko jab hiñDole par chaḌhā vo rashk-e-mehr

maiñ ye samjhā āsmāñ zer-o- zabar hone lagā

sher sun kar mudda.ī marne lage kaTne lage

ab suḳhan meñ mere saifī kā asar hone lagā

le ke dil sūrat chhupāne se bhalā kyā fā.eda

be-muravvat ab to jānoñ kā zarar hone lagā

arsh tak jis din ga.ī āh-e-rasā sun liijo 'rind'

ālam-e-bālā meñ shor-e-al-hazar hone lagā

ishq mein haal-e-jahan naua-e-digar hone laga

ai pari diwana tujh par har bashar hone laga

husn se aagah ab wo be-KHabar hone laga

aaina jo us ko manzur-e-nazar hone laga

raounaq-afza baam-par wo beshtar hone laga

band mare bhiD ke ab rahguzar hone laga

gosh-zad jis ke hua sar-gashtaqi ka meri haal

ungliyan kanon mein din dauran-e-sar hone laga

ek na ek iza rahi har dam badaulat ishq ke

dard-e-dil achchha hua dard-e-jigar hone laga

wasl ki shab ho chuki paida hue aasar-e-subh

par dil ke nala-e-murgh-e-sahar hone laga

jis ne moti gosh mein dekha tere kahne laga

hai tamasha kan se paida guhar hone laga

mai-kashi mauquf jam-o-shisha rakh baala-e-taq

rang -e-mahfil saqiya nau-e- digar hone laga

ru-e-anwar par hua aaghaz KHatt-e-ru-siyah

ye baDa andher ai rashk-e-qamar hone laga

mere marne ki jo di us hur ko ja kar KHabar

sunte hi irshad finnar-o-saqar hone laga

jhulne ko jab hinDole par chaDha wo rashk-e-mehr

main ye samjha aasman zer-o- zabar hone laga

sher sun kar muddai marne lage kaTne lage

ab suKHan mein mere saifi ka asar hone laga

le ke dil surat chhupane se bhala kya faeda

be-murawwat ab to jaanon ka zarar hone laga

arsh tak jis din gai aah-e-rasa sun lijo 'rind'

aalam-e-baala mein shor-e-al-hazar hone laga