ishq ne dil ko nau-jawan kiya

ishq ne dil ko nau-javān kiyā

hijr ne tan ko nā-tavān kiyā

terī ulfat ne ham se ai pyāre

ek aalam ko bad-gumān kiyā

phir ga.e ham se āshnā-e-qadīm

ishq meñ sab kā imtihān kiyā

qissa-e-ishq sab ga.e the bhuul

taaza ham ne ye dāstān kiyā

uḌ gayā sun ke hosh nāseh kā

hāl-e-dil maiñ ne jab bayān kiyā

kahiye is tifl ko javān tāle.a

piir ko jis pe mehrbān kiyā

kyā ajab hai vo tālib us kā ho

jis ne matlūb ik jahān kiyā

hai vo be-shak 'turāb' kā jānāñ

sadqe jis par maiñ apnā jaan kiyā

ishq ne dil ko nau-jawan kiya

hijr ne tan ko na-tawan kiya

teri ulfat ne hum se ai pyare

ek aalam ko bad-guman kiya

phir gae hum se aashna-e-qadim

ishq mein sab ka imtihan kiya

qissa-e-ishq sab gae the bhul

taza hum ne ye dastan kiya

uD gaya sun ke hosh naseh ka

haal-e-dil main ne jab bayan kiya

kahiye is tifl ko jawan talea

pir ko jis pe mehrban kiya

kya ajab hai wo talib us ka ho

jis ne matlub ek jahan kiya

hai wo be-shak 'turab' ka jaanan

sadqe jis par main apna jaan kiya