ishq ne jakDa hai mujhko is kaDi zanjir se

ishq ne jakḌā hai mujh ko is kaḌī zanjīr se

jis ke halqe khul nahīñ sakte kisī tadbīr se

aur hī kuchh ho shab-e-furqat ke kaTne kī sabīl

dil tasavvur se bahaltā hai na ab tasvīr se

ḳhat ise mat kah ye likhā hai mirī taqdīr kā

dil ko hai ik rabt terī shoḳhi-e-tahrīr se

zindagī-bhar ik suhānā ḳhvāb ham dekhā kiye

terī sūrat mil ga.ī us ḳhvāb kī ta.abīr se

us nigāh-e-nāz par sadqe dil-o-jāñ ho ga.e

aap ne dekhā nishāne do uḌe ik tiir se

ab to bas do hichkiyoñ kī baat baaqī rah ga.ī

aap ne pūchhā mujhe lekin baḌī tāḳhīr se

ġham kī tanhā.ī ke sannāTe meñ tanhā thā 'nasīr'

thā to kho jaatā magar tum mil ga.e taqdīr se

ishq ne jakDa hai mujh ko is kaDi zanjir se

jis ke halqe khul nahin sakte kisi tadbir se

aur hi kuchh ho shab-e-furqat ke kaTne ki sabil

dil tasawwur se bahalta hai na ab taswir se

KHat ise mat kah ye likha hai meri taqdir ka

dil ko hai ek rabt teri shoKHi-e-tahrir se

zindagi-bhar ek suhana KHwab hum dekha kiye

teri surat mil gai us KHwab ki tabir se

us nigah-e-naz par sadqe dil-o-jaan ho gae

aap ne dekha nishane do uDe ek tir se

ab to bas do hichkiyon ki baat baqi rah gai

aap ne puchha mujhe lekin baDi taKHir se

gham ki tanhai ke sannaTe mein tanha tha 'nasir'

tha to kho jata magar tum mil gae taqdir se