naz-o-andaz ka iKHlas ka danai ka

nāz-o-andāz kā iḳhlās kā dānā.ī kā

dil hai dil-dāda tire jalva-e-zebā.ī kā

aap aa jaanā vakālat ke liye mahshar meñ

rab ke darbār meñ jo vaqt ho sunvā.ī kā

aañkh bhī paas rakhūñ aur na dekhūñ tum ko

koī matlab hī nahīñ phir mirī bīnā.ī kā

zaḳhm dene kī to fitrat hai tirī detā jā

hai hunar mere bhī nashr meñ masīhā.ī kā

jalva-e-yār jo dekhā to ḳhudā yaad aayā

dil meñ paidā huā armān jabīñ-sā.ī kā

ġhair ne le lī virāsat jo mirī hairat kyā

aaj to khāne lagā bhaa.ī bhī haq bhaa.ī kā

mashvara hai ye hamārā ki sadā jhuk ke chalo

tum ko 'iz.hār' jo armān hai ūñchā.ī kā

naz-o-andaz ka iKHlas ka danai ka

dil hai dil-dada tere jalwa-e-zebai ka

aap aa jaana wakalat ke liye mahshar mein

rab ke darbar mein jo waqt ho sunwai ka

aankh bhi pas rakhun aur na dekhun tum ko

koi matlab hi nahin phir meri binai ka

zaKHm dene ki to fitrat hai teri deta ja

hai hunar mere bhi nashr mein masihai ka

jalwa-e-yar jo dekha to KHuda yaad aaya

dil mein paida hua arman jabin-sai ka

ghair ne le li wirasat jo meri hairat kya

aaj to khane laga bhai bhi haq bhai ka

mashwara hai ye hamara ki sada jhuk ke chalo

tum ko 'izhaar' jo arman hai unchai ka