tham ke baiTh zara KHud ko dil-e-zar abhi

thaam ke baiTh zarā ḳhud ko dil-e-zār abhī

be-naqāb aa.egā vo husn-e-tarah-dār abhī

husn kī sham.a ko qindīl se bāhar kiije

jazba-e-ishq ko ik aañch hai darkār abhī

qāfila kaise vahāñ jāygā manzil kī taraf

ḳhud hī bhaTkā hai jahāñ qāfila-e-sālār abhī

jab talak maañ kī duāoñ ke nagīne na jaḌeñ

phir samajh le ke tirā taaj hai be-kār abhī

manzil-e-haq pe pahuñchnā hai to phir sabr bhī kar

biich meñ ā.eñge kuchh marhale dushvār abhī

jab talak diid kā sharbat na piyegā saaqī

uThne vaalā nahīñ mai-ḳhāne se 'iz.hār' abhī

tham ke baiTh zara KHud ko dil-e-zar abhi

be-naqab aaega wo husn-e-tarah-dar abhi

husn ki shama ko qindil se bahar kije

jazba-e-ishq ko ek aanch hai darkar abhi

qafila kaise wahan jayga manzil ki taraf

KHud hi bhaTka hai jahan qafila-e-salar abhi

jab talak man ki duaon ke nagine na jaDen

phir samajh le ke tera taj hai be-kar abhi

manzil-e-haq pe pahunchna hai to phir sabr bhi kar

bich mein aaenge kuchh marhale dushwar abhi

jab talak did ka sharbat na piyega saqi

uThne wala nahin mai-KHane se 'izhaar' abhi