iztirab-e-ashiqi phir kar-farma ho gaya

iztirāb-e-āshiqī phir kār-farmā ho gayā

sabr merā nā-shakebā.ī sarāpā ho gayā

sādgī-hā-e-tamannā ke maze jaate rahe

ho ga.e mushtāq ham aur vo ḳhud-ārā ho gayā

vaa.e nākāmī na samjhā kaun hai pesh-e-nazar

maiñ ki husn-e-yār kā mahv-e-tamāshā ho gayā

naujavānī thī koī shaidā na thā mere sivā

ek husn-e-kār kā vo bhī zamāna ho gayā

shorisheñ jaatī rahīñ vo ārzū-e-vasl kī

rañj-e-dūrī marham-e-zaḳhm-e-tamanna ho gayā

sehr vo kyā thā nigāh-e-āshnā-e-yār meñ

jo dil-e-bīmār ke haq meñ masīhā ho gayā

zabt se rāz-e-mohabbat kā chhupānā thā muhāl

shauq gar pinhāñ huā ġham āshkārā ho gayā

hai zabān-e-lucknow meñ rañg-e-dehlī kā numūd

tujh se 'hasrat' naam raushan shā.irī kā ho gayā

iztirab-e-ashiqi phir kar-farma ho gaya

sabr mera na-shakebai sarapa ho gaya

sadgi-ha-e-tamanna ke maze jate rahe

ho gae mushtaq hum aur wo KHud-ara ho gaya

wae nakaami na samjha kaun hai pesh-e-nazar

main ki husn-e-yar ka mahw-e-tamasha ho gaya

naujawani thi koi shaida na tha mere siwa

ek husn-e-kar ka wo bhi zamana ho gaya

shorishen jati rahin wo aarzu-e-wasl ki

ranj-e-duri marham-e-zaKHm-e-tamanna ho gaya

sehr wo kya tha nigah-e-ashna-e-yar mein

jo dil-e-bimar ke haq mein masiha ho gaya

zabt se raaz-e-mohabbat ka chhupana tha muhaal

shauq gar pinhan hua gham aashkara ho gaya

hai zaban-e-lucknow mein rang-e-dehli ka numud

tujh se 'hasrat' nam raushan shairi ka ho gaya