اضطراب عاشقی پھر کار فرما ہو گیا

اضطراب عاشقی پھر کار فرما ہو گیا

صبر میرا نا شکیبائی سراپا ہو گیا

سادگی ہائے تمنا کے مزے جاتے رہے

ہو گئے مشتاق ہم اور وہ خود آرا ہو گیا

وائے ناکامی نہ سمجھا کون ہے پیش نظر

میں کہ حسن یار کا محو تماشا ہو گیا

نوجوانی تھی کوئی شیدا نہ تھا میرے سوا

ایک حسن کار کا وہ بھی زمانہ ہو گیا

شورشیں جاتی رہیں وہ آرزوئے وصل کی

رنج دوری مرہم زخم تمنا ہو گیا

سحر وہ کیا تھا نگاہ آشنائے یار میں

جو دل بیمار کے حق میں مسیحا ہو گیا

ضبط سے راز محبت کا چھپانا تھا محال

شوق گر پنہاں ہوا غم آشکارا ہو گیا

ہے زبان لکھنؤ میں رنگ دہلی کا نمود

تجھ سے حسرتؔ نام روشن شاعری کا ہو گیا