jam ka etibar kya kaam-o-dahan bhi kuchh nahin

jaam kā e'tibār kyā kām-o-dahāñ bhī kuchh nahīñ

dair-o-haram ko kyā kahūñ kaun-o-makāñ bhī kuchh nahīñ

soz-e-nihāñ bhī kuchh nahīñ husn-e-'ayāñ bhī kuchh nahīñ

yā'nī yahāñ bhī kuchh nahīñ aur vahāñ bhī kuchh nahīñ

ye bhī tirī nigāh se vo bhī tire ḳhayāl se

josh-e-junūñ bhī kuchh nahīñ dard-e-nihāñ bhī kuchh nahīñ

zauq-e-niyāz tak raheñ husn kī be-niyāziyāñ

merā jahāñ to thā hī kyā terā jahāñ bhī kuchh nahīñ

tum ho surūr-e-dil sahī tum ho sukūn-e-jāñ magar

ye merā dil bhī kuchh nahīñ ye merī jaañ bhī kuchh nahīñ

kar ke tabāh jān-o-dil dard-e-nihāñ milā mujhe

aa ga.e paas tum to ab dard-e-nihāñ bhī kuchh nahīñ

aap hī ḳhud sambhāl le aake hudūd-e-nāz ko

ho gayā gum jo maiñ to phir terā nishāñ bhī kuchh nahīñ

ḳhud mirā mudda'ā batā ḳhud hī use qubūl kar

merī du'ā bhī kuchh nahīñ merī zabāñ bhī kuchh nahīñ

jam ka e'tibar kya kaam-o-dahan bhi kuchh nahin

dair-o-haram ko kya kahun kaun-o-makan bhi kuchh nahin

soz-e-nihan bhi kuchh nahin husn-e-'ayan bhi kuchh nahin

ya'ni yahan bhi kuchh nahin aur wahan bhi kuchh nahin

ye bhi teri nigah se wo bhi tere KHayal se

josh-e-junun bhi kuchh nahin dard-e-nihan bhi kuchh nahin

zauq-e-niyaz tak rahen husn ki be-niyaziyan

mera jahan to tha hi kya tera jahan bhi kuchh nahin

tum ho surur-e-dil sahi tum ho sukun-e-jaan magar

ye mera dil bhi kuchh nahin ye meri jaan bhi kuchh nahin

kar ke tabah jaan-o-dil dard-e-nihan mila mujhe

aa gae pas tum to ab dard-e-nihan bhi kuchh nahin

aap hi KHud sambhaal le aake hudud-e-naz ko

ho gaya gum jo main to phir tera nishan bhi kuchh nahin

KHud mera mudda'a bata KHud hi use qubul kar

meri du'a bhi kuchh nahin meri zaban bhi kuchh nahin