jaan chhuTe uljhanon se apni ye qismat nahin

jaan chhūTe uljhanoñ se apnī ye qismat nahīñ

maut bhī aa.e to marne kī mujhe fursat nahīñ

ham adū se pūchhte haiñ bazm meñ aatā hai kyuuñ

aap se jhagḌā nahīñ hai aap se hujjat nahīñ

dard kī sūrat uThā aañsū kī sūrat gir paḌā

jab se vo himmat nahīñ kisī bal nahīñ tāqat nahīñ

ek haiñ nazroñ meñ shaiḳh-o-vā.iz-o-pīr-e-muġhāñ

tere mastoñ ko kisī ke haath par bai.at nahīñ

aur haiñ jin ko hai ḳhabt-e-ishq-e-hūrān-e-jināñ

ham ko saudā-e-havā-e-gulshan-e-jannat nahīñ

us ne likkhā ḳhat meñ ye shikva na karnā jaur kā

ham ne likh bhejā hai itnā apnī ye aadat nahīñ

bistar-e-rāhat faqat insāñ ko hai a.amāl-e-ḳhair

farsh-e-maḳhmal bhī lahad meñ ho to kuchh rāhat nahīñ

sham.a mahfil meñ rahā kartī hai bulbul baaġh meñ

sāhab-e-tauqīr kī dekho kahāñ izzat nahīñ

baḌh rahā hai dard-e-dil āñkhoñ meñ phirtī hai ajal

ai shab-e-ġham aaj bachne kī koī sūrat nahīñ

be-kasoñ kī kaun suntā hai kahānī bād-e-marg

kis ghaḌī nālāñ zabān-e-sabza-e-turbat nahīñ

ḳhān-e-kunj-e-lahad meñ kyā ḳhamoshī chhā.ī hai

koī apnā koī monis koī ham-sohbat nahīñ

rahte haiñ har-dam numā.ish se barī ahl-e-kamāl

ḳhud-pasandī kī kabhī tasvīr ko aadat nahīñ

sham.a kal hogī na ye chādar rahegī phuul kī

ḳhāna-e-kunj-e-lahad minnat-kash-e-zīnat nahīñ

pairvī-e-bandish-e-'taslīm' go kartā huuñ 'arsh'

phir bhī ma.anī meñ bulandī lafz meñ shaukat nahīñ

jaan chhuTe uljhanon se apni ye qismat nahin

maut bhi aae to marne ki mujhe fursat nahin

hum adu se puchhte hain bazm mein aata hai kyun

aap se jhagDa nahin hai aap se hujjat nahin

dard ki surat uTha aansu ki surat gir paDa

jab se wo himmat nahin kisi bal nahin taqat nahin

ek hain nazron mein shaiKH-o-waiz-o-pir-e-mughan

tere maston ko kisi ke hath par baiat nahin

aur hain jin ko hai KHabt-e-ishq-e-huran-e-jinan

hum ko sauda-e-hawa-e-gulshan-e-jannat nahin

us ne likkha KHat mein ye shikwa na karna jaur ka

hum ne likh bheja hai itna apni ye aadat nahin

bistar-e-rahat faqat insan ko hai aamal-e-KHair

farsh-e-maKHmal bhi lahad mein ho to kuchh rahat nahin

shama mahfil mein raha karti hai bulbul bagh mein

sahab-e-tauqir ki dekho kahan izzat nahin

baDh raha hai dard-e-dil aankhon mein phirti hai ajal

ai shab-e-gham aaj bachne ki koi surat nahin

be-kason ki kaun sunta hai kahani baad-e-marg

kis ghaDi nalan zaban-e-sabza-e-turbat nahin

KHan-e-kunj-e-lahad mein kya KHamoshi chhai hai

koi apna koi monis koi ham-sohbat nahin

rahte hain har-dam numaish se bari ahl-e-kamal

KHud-pasandi ki kabhi taswir ko aadat nahin

shama kal hogi na ye chadar rahegi phul ki

KHana-e-kunj-e-lahad minnat-kash-e-zinat nahin

pairwi-e-bandish-e-'taslim' go karta hun 'arsh'

phir bhi mani mein bulandi lafz mein shaukat nahin