jab sitam karte hain wo gham aazmane ke liye

jab sitam karte haiñ vo ġham āzmāne ke liye

muskurā detā huuñ un kā dil baḌhāne ke liye

zauq-e-sajda jab huā tasvīr-e-jānāñ khīñch lī

ḳhud banā letā huuñ ka.aba sar jhukāne ke liye

gar mukammal ho ga.ī ḳhud-dārī-e-zauq-e-nazar

ḳhud-ba-ḳhud aa jā.eñge jalve manāne ke liye

kartī hai fitrat yahāñ tak nāz-bardārī-e-husn

aa.ī shabnam guloñ kā muñh dhulāne ke liye

aa gayā hai vaqt mere āḳhirī dīdār kā

aap bhī aa jā.iye sūrat dikhāne ke liye

ho ga.ī sākin zabāñ lab Thahar Thahar kar rah ga.e

jab milā mauqa ġham-e-ulfat sunāne ke liye

ranj-vo-ġham meñ sikuḌnā khel samjhe ho 'rashīd'

chāhiye patthar kā dil sadme uThāne ke liye

jab sitam karte hain wo gham aazmane ke liye

muskura deta hun un ka dil baDhane ke liye

zauq-e-sajda jab hua taswir-e-jaanan khinch li

KHud bana leta hun kaba sar jhukane ke liye

gar mukammal ho gai KHud-dari-e-zauq-e-nazar

KHud-ba-KHud aa jaenge jalwe manane ke liye

karti hai fitrat yahan tak naz-bardari-e-husn

aai shabnam gulon ka munh dhulane ke liye

aa gaya hai waqt mere aaKHiri didar ka

aap bhi aa jaiye surat dikhane ke liye

ho gai sakin zaban lab Thahar Thahar kar rah gae

jab mila mauqa gham-e-ulfat sunane ke liye

ranj-wo-gham mein sikuDna khel samjhe ho 'rashid'

chahiye patthar ka dil sadme uThane ke liye