jab wo uljhi zulfen suljhate hain hum

jab vo uljhī zulfeñ suljhāte haiñ ham

vo sulajhtī haiñ ulajh jaate haiñ ham

apne saath un ko lagā laate haiñ ham

nard kī sī chaal chal jaate haiñ ham

nabz merī dekh kar bolā tabīb

aap ruḳhsat ho chuke jaate haiñ ham

dil bhī kuchh ab ham se bal karne lagā

us ko mār-e-āstīñ paate haiñ ham

ye ishāre haiñ ġhazāl-e-chashm ke

āñḳheñ sheroñ ko bhī dikhlāte haiñ ham

kahte haiñ ye sikka-e-dāġh-e-junūñ

hoñ jo khoTe bhī to chal jaate haiñ ham

hai mai-e-ulfat kī kaifiyat hī aur

piite haiñ vo nashsha meñ aate haiñ ham

kūcha-e-gesū kī miTTī lā sabā

itr-e-ambar aaj khichvāte haiñ ham

ḳhuub is duniyā kī 'akbar' sair kī

ab sū-e-mulk-e-adam jaate haiñ ham

jab wo uljhi zulfen suljhate hain hum

wo sulajhti hain ulajh jate hain hum

apne sath un ko laga late hain hum

nard ki si chaal chal jate hain hum

nabz meri dekh kar bola tabib

aap ruKHsat ho chuke jate hain hum

dil bhi kuchh ab hum se bal karne laga

us ko mar-e-astin pate hain hum

ye ishaare hain ghazal-e-chashm ke

aanKHen sheron ko bhi dikhlate hain hum

kahte hain ye sikka-e-dagh-e-junun

hon jo khoTe bhi to chal jate hain hum

hai mai-e-ulfat ki kaifiyat hi aur

pite hain wo nashsha mein aate hain hum

kucha-e-gesu ki miTTi la saba

itr-e-ambar aaj khichwate hain hum

KHub is duniya ki 'akbar' sair ki

ab su-e-mulk-e-adam jate hain hum