جب وہ الجھی زلفیں سلجھاتے ہیں ہم

جب وہ الجھی زلفیں سلجھاتے ہیں ہم

وہ سلجھتی ہیں الجھ جاتے ہیں ہم

اپنے ساتھ ان کو لگا لاتے ہیں ہم

نرد کی سی چال چل جاتے ہیں ہم

نبض میری دیکھ کر بولا طبیب

آپ رخصت ہو چکے جاتے ہیں ہم

دل بھی کچھ اب ہم سے بل کرنے لگا

اس کو مار آستیں پاتے ہیں ہم

یہ اشارے ہیں غزال چشم کے

آنکھیں شیروں کو بھی دکھلاتے ہیں ہم

کہتے ہیں یہ سکۂ داغ جنوں

ہوں جو کھوٹے بھی تو چل جاتے ہیں ہم

ہے مئے الفت کی کیفیت ہی اور

پیتے ہیں وہ نشہ میں آتے ہیں ہم

کوچۂ گیسو کی مٹی لا صبا

عطر عنبر آج کچھواتے ہیں ہم

خوب اس دنیا کی اکبرؔ سیر کی

اب سوئے ملک عدم جاتے ہیں ہم