jafa se wafa mustarad ho gai

jafā se vafā mustarad ho ga.ī

yahāñ ham bhī qaa.il haiñ had ho ga.ī

nigāhoñ meñ phirtī hai āThoñ pahar

qayāmat bhī zālim kā qad ho ga.ī

azal meñ jo ik laag tujh se huī

vo āḳhir ko dāġh-e-abad ho ga.ī

mirī intihā-e-vafā kuchh na pūchh

jafā dekh jo lā-ta.ad ho ga.ī

mukarte ho allāh ke sāmne

ab aisā bhī kyā jhuuT had ho ga.ī

ta.alluq jo palTā to jhagḌā banā

mohabbat jo badlī to kad ho ga.ī

vo āñkhoñ kī hadd-e-nazar kab bane

nazar ḳhud vahāñ jā ke had ho ga.ī

jafā se unhoñ ne diyā dil pe daaġh

mukammal vafā kī sanad ho ga.ī

qayāmat meñ 'muztar' kisī se mile

kahāñ jā ke gherā hai had ho ga.ī

jafa se wafa mustarad ho gai

yahan hum bhi qail hain had ho gai

nigahon mein phirti hai aaThon pahar

qayamat bhi zalim ka qad ho gai

azal mein jo ek lag tujh se hui

wo aaKHir ko dagh-e-abad ho gai

meri intiha-e-wafa kuchh na puchh

jafa dekh jo la-tad ho gai

mukarte ho allah ke samne

ab aisa bhi kya jhuT had ho gai

talluq jo palTa to jhagDa bana

mohabbat jo badli to kad ho gai

wo aankhon ki hadd-e-nazar kab bane

nazar KHud wahan ja ke had ho gai

jafa se unhon ne diya dil pe dagh

mukammal wafa ki sanad ho gai

qayamat mein 'muztar' kisi se mile

kahan ja ke ghera hai had ho gai