hawa har sans ki humse jo qimat le to kya hoga

havā har saañs kī ham se jo qīmat le to kyā hogā

kirāya dhuup kā sūraj agar māñge to kyā hogā

kahīñ duniyā kā kārobār Thap hokar na rah jaa.e

ḳhudā ke kaam sab karne lage bande to kyā hogā

ka.ī bātoñ se ab bhī be-ḳhabar haiñ to ye hālat hai

nigāhoñ se agar uTh jā.eñge parde to kyā hogā

kisī beTī ne apne baap se pūchhā ki abbū jī

yūñhī bāzār meñ bikte rahe dūlhe to kyā hogā

na koī chhīn le ma.asūmiyat un phuul chehroñ kī

baḌoñ jaisā dikhā.ī deñ agar bachche to kyā hogā

hai jab tak pyaar duniyā meñ chalegī saañs duniyā kī

magar kho jā.eñge jab pyaar ke jazbe to kyā hogā

abhī to sirf ta.abīreñ hī mahñgī haiñ yahāñ 'akbar'

ye socho ḳhvāb bhī ho jaa.eñ gar mahñge to kyā hogā

hawa har sans ki hum se jo qimat le to kya hoga

kiraya dhup ka suraj agar mange to kya hoga

kahin duniya ka karobar Thap hokar na rah jae

KHuda ke kaam sab karne lage bande to kya hoga

kai baaton se ab bhi be-KHabar hain to ye haalat hai

nigahon se agar uTh jaenge parde to kya hoga

kisi beTi ne apne bap se puchha ki abbu ji

yunhi bazar mein bikte rahe dulhe to kya hoga

na koi chhin le masumiyat un phul chehron ki

baDon jaisa dikhai den agar bachche to kya hoga

hai jab tak pyar duniya mein chalegi sans duniya ki

magar kho jaenge jab pyar ke jazbe to kya hoga

abhi to sirf tabiren hi mahngi hain yahan 'akbar'

ye socho KHwab bhi ho jaen gar mahnge to kya hoga