har chand lutf anjuman-araiyon mein tha

har chand lutf anjuman-ārā.iyoñ meñ thā

par vo maza alag thā jo tanhā.iyoñ meñ thā

alfāz meñ na Dhaal sakā us ko maiñ kabhī

jo dard merī ruuh kī gahrā.iyoñ meñ thā

dar khaTkāte kis kā ham insāf ke liye

munsif hamāre shahar kā balvā.iyoñ meñ thā

ġham ye nahīñ tamāshā banāyā gayā merā

ġham ye hai merā bhaa.ī tamāshā.iyoñ meñ thā

tārīḳh ham pe ro.egī ye kah ke ek din

ahl-e-vafā kā naam bhī harjā.iyoñ meñ thā

kyā karte le ke muft meñ pūnam kī chāñdnī

uljhā huā dimāġh to mahañgā.iyoñ meñ thā

rishtoñ kā desh chhoḌ ke niklā to yuuñ lagā

jaise maiñ jītī-jāgtī parchhā.iyoñ meñ thā

nikle nahīñ the puurī tarah jis ke bāl-o-par

us kā ḳhayāl arsh kī ūñchā.iyoñ meñ thā

mushk-o-gulāb-sā kisī parda-nashīñ kā naam

'akbar' hamāre hisse kī rusvā.iyoñ meñ thā

har chand lutf anjuman-araiyon mein tha

par wo maza alag tha jo tanhaiyon mein tha

alfaz mein na Dhaal saka us ko main kabhi

jo dard meri ruh ki gahraiyon mein tha

dar khaTkate kis ka hum insaf ke liye

munsif hamare shahar ka balwaiyon mein tha

gham ye nahin tamasha banaya gaya mera

gham ye hai mera bhai tamashaiyon mein tha

tariKH hum pe roegi ye kah ke ek din

ahl-e-wafa ka nam bhi harjaiyon mein tha

kya karte le ke muft mein punam ki chandni

uljha hua dimagh to mahangaiyon mein tha

rishton ka desh chhoD ke nikla to yun laga

jaise main jiti-jagti parchhaiyon mein tha

nikle nahin the puri tarah jis ke baal-o-par

us ka KHayal arsh ki unchaiyon mein tha

mushk-o-gulab-sa kisi parda-nashin ka nam

'akbar' hamare hisse ki ruswaiyon mein tha