jalwa jo tere ruḳh kā ehsās meñ Dhal jae

jalva jo tire ruḳh kā ehsās meñ Dhal jaa.e

is ālam-e-hastī kā aalam hī badal jaa.e

un mast nigāhoñ kā ik daur jo chal jaa.e

ham dard ke māroñ kī taqdīr badal jaa.e

masrūf-e-ibādat kā yuuñ ḳhatm ho afsāna

sar ho tirī chaukhaT pe dam merā nikal jaa.e

tū laakh bachā dāman dar se na uThūñgā maiñ

un meñ se nahīñ huuñ maiñ Taale se jo Tal jaa.e

ai jān-e-karam mujh par ek chashm-e-karam kar de

aisā na ho dīvāna qadmoñ pe machal jaa.e

hasrat bharī āñkhoñ meñ ik pal ke liye aa jā

dekhe jo terī sūrat dīvāna bahal jaa.e

tū aag mohabbat kī bhar de mirī nas nas meñ

har zarra mire dil kā is aag meñ jal jaa.e

bijlī tire jalvoñ kī gir jaa.e kabhī mujh par

ai jaan mirī hastī is aag meñ jal jaa.e

ai chāragaro dekho bīmār-e-mohabbat huuñ

tadbīr karo aisī dil jis se bahal jaa.e

tū jazb-e-mohabbat meñ kar le vo asar paidā

jis samt nazar uTThe ik tiir sā chal jaa.e

pāmāl-e-rah-e-ulfat ho jā.ūñ mohabbat meñ

vo shoḳh agar mujh ko qadmoñ se masal jaa.e

taqdīr kare ehsāñ yuuñ ba.ad-e-'fanā' mujh par

ḳhāk-e-dar-e-jānāna muñh par mire mal jaa.e

jalwa jo tere ruḳh kā ehsās meñ Dhal jae

is ālam-e-hastī kā aalam hī badal jae

un mast nigāhoñ kā ek daur jo chal jae

hum dard ke māroñ kī taqdīr badal jae

masrūf-e-ibādat kā yuñ ḳhatm ho afsāna

sar ho tirī chaukhaT pe dam merā nikal jae

tū lakh bachā dāman dar se na uThūñgā maiñ

un meñ se nahīñ huñ maiñ Tale se jo Tal jae

ai jān-e-karam mujh par ek chashm-e-karam kar de

aisā na ho dīwāna qadmoñ pe machal jae

hasrat bharī āñkhoñ meñ ek pal ke liye aa jā

dekhe jo terī sūrat dīwāna bahal jae

tū aag mohabbat kī bhar de mirī nas nas meñ

har zarra mere dil kā is aag meñ jal jae

bijlī tere jalwoñ kī gir jae kabhī mujh par

ai jaan mirī hastī is aag meñ jal jae

ai chāragaro dekho bīmār-e-mohabbat huñ

tadbīr karo aisī dil jis se bahal jae

tū jazb-e-mohabbat meñ kar le wo asar paidā

jis samt nazar uTThe ek tir sā chal jae

pāmāl-e-rah-e-ulfat ho jāūñ mohabbat meñ

wo shoḳh agar mujh ko qadmoñ se masal jae

taqdīr kare ehsāñ yuñ baad-e-'fanā' mujh par

ḳhāk-e-dar-e-jānāna muñh par mere mal jae