nigah-e-naz ka ehsan hai dil-afgaron par

nigah-e-nāz kā ehsāñ hai dil-afgāroñ par

tīr-e-mizhgāñ kī navāzish hai jigar-pāroñ par

ho gayā ain-e-taḳhayyul meñ visāl-e-dilbar

merī ġhaflat bhī sharf le ga.ī hoshyāroñ par

kHāna-e-pīr-e-muġhāñ barsoñ thā apnā maskan

duḳhtar-e-raz kī ināyat thī jo kHumāroñ par

ek qatra bhī jo vaa.iz ko mayassar aatā

ta.an-e-kotāh se ishq ke sarshāroñ par

ġhamza-o-ishva-o-andāz-o-adā-e-qātil

dil ko ham kar chuke taqsīm inhīñ do chāroñ par

chal junūñ bādiya-paimā.ī se sū-e-gulshan

aaj masrūf-e-ināyat hai vo gulzāroñ par

dil ko kis tarah se ham pher leñ ab dilbar se

bas to chaltā hai kisī kā nahīñ dil-dāroñ par

ho gayā dāman-e-dildār kā mujh ko dhoka

shab ko ik dam jo nazar paḌ ga.ī sayyāroñ par

nargisī chashm se jā kar koī itnā kah de

hālat-e-naza.a hai taarī tire bīmāroñ par

daulat-e-vasl but-sīm-badan se thī ġhanī

ham ko kuchh rashk na aayā kabhī zar-dāroñ par

chashm mīgoñ ke tasavvur meñ kisī kī 'jauhar'

saḳht dil dauḌte haiñ āñsuoñ ke tāroñ par

nigah-e-naz ka ehsan hai dil-afgaron par

tir-e-mizhgan ki nawazish hai jigar-paron par

ho gaya ain-e-taKHayyul mein visal-e-dilbar

meri ghaflat bhi sharf le gai hoshyaron par

kHana-e-pir-e-mughan barson tha apna maskan

duKHtar-e-raz ki inayat thi jo kHumaron par

ek qatra bhi jo waiz ko mayassar aata

tan-e-kotah se ishq ke sarshaaron par

ghamza-o-ishwa-o-andaz-o-ada-e-qatil

dil ko hum kar chuke taqsim inhin do chaaron par

chal junun baadiya-paimai se su-e-gulshan

aaj masruf-e-inayat hai wo gulzaron par

dil ko kis tarah se hum pher len ab dilbar se

bas to chalta hai kisi ka nahin dil-daron par

ho gaya daman-e-dildar ka mujh ko dhoka

shab ko ek dam jo nazar paD gai sayyaron par

nargisi chashm se ja kar koi itna kah de

haalat-e-naza hai tari tere bimaron par

daulat-e-wasl but-sim-badan se thi ghani

hum ko kuchh rashk na aaya kabhi zar-daron par

chashm migon ke tasawwur mein kisi ki 'jauhar'

saKHt dil dauDte hain aansuon ke taron par