نگہ ناز کا احساں ہے دل افگاروں پر

نگہ ناز کا احساں ہے دل افگاروں پر

تیر مژگاں کی نوازش ہے جگر پاروں پر

ہو گیا عین تخیل میں وصال دلبر

میری غفلت بھی شرف لے گئی ہوشیاروں پر

خانۂ پیر مغاں برسوں تھا اپنا مسکن

دختر رز کی عنایت تھی جو خماروں پر

ایک قطرہ بھی جو واعظ کو میسر آتا

طعن کوتاہ سے عشق کے سرشاروں پر

غمزۂ و عشوہ و انداز وادائے قاتل

دل کو ہم کر چکے تقسیم انہیں دو چاروں پر

چل جنوں بادیہ پیمائی سے سوئے گلشن

آج مصروف عنایت ہے وہ گلزاروں پر

دل کو کس طرح سے ہم پھیر لیں اب دلبر سے

بس تو چلتا ہے کسی کا نہیں دل داروں پر

ہو گیا دامن دل دار کا مجھ کو دھوکہ

شب کو اک دم جو نظر پڑ گئی سیاروں پر

نرگسی چشم سے جا کر کوئی اتنا کہہ دے

حالت نزع ہے طاری ترے بیماروں پر

دولت وصل بت سیم بدن سے تھی غنی

ہم کو کچھ رشک نہ آیا کبھی زر داروں پر

چشم میگوں کے تصور میں کسی کی جوہرؔ

سخت دل دوڑتے ہیں آنسوؤں کے تاروں پر