ye andhera pahle suraj ko chura le jaega

ye añdherā pahle sūraj ko churā le jā.egā

phir zamāne se ujāloñ ko uThā le jā.egā

tapte sahrā kī bujhāne tishnagī ke vāste

apnī āñkhoñ meñ samundar vo chhupā le jā.egā

jis jagah par chal rahī haiñ nafratoñ kī āñdhi.yāñ

pyaar kī sham.a koī kaise jalā le jā.egā

hādisa koī na aa.egā safar meñ us ko pesh

saath apne jo koī maañ kī duā le jā.egā

zard patte is liye haiñ ḳhauf se sahme hue

koī jhoñkā aa.egā ham ko uḌā le jā.egā

maiñ ḳhayāloñ ke safar meñ bhuul sā ye bhī gayā

apne ghar tak kaun sā ab rāsta le jā.egā

tīrgī kā ḳhauf 'jauhar' na koī rahzan kā Dar

jo safar meñ saath ishq-e-mustafā le jā.egā

ye andhera pahle suraj ko chura le jaega

phir zamane se ujalon ko uTha le jaega

tapte sahra ki bujhane tishnagi ke waste

apni aankhon mein samundar wo chhupa le jaega

jis jagah par chal rahi hain nafraton ki aandhiyan

pyar ki shama koi kaise jala le jaega

hadisa koi na aaega safar mein us ko pesh

sath apne jo koi man ki dua le jaega

zard patte is liye hain KHauf se sahme hue

koi jhonka aaega hum ko uDa le jaega

main KHayalon ke safar mein bhul sa ye bhi gaya

apne ghar tak kaun sa ab rasta le jaega

tirgi ka KHauf 'jauhar' na koi rahzan ka Dar

jo safar mein sath ishq-e-mustafa le jaega