jawani talak lutf tha zindagi ka

javānī talak lutf thā zindagī kā

buḌhāpe ne khoyā mazā zindagī kā

na tujh se milā jo yahāñ jiite jiite

use umr bhar ġham rahā zindagī kā

masīhā-nafas tujh ko kahte haiñ āshiq

tire dam se hī aasrā zindagī kā

sunā de use qum-bi-iznī kā naġhma

dikhā de zara mo.ajiza zindagī kā

jo duniyā meñ rah ke huā haq se ġhāfil

natīja use kyā milā zindagī kā

bahār aa.ī phir bulbuleñ jī uTheñgī

sunātī hai muzda sabā zindagī kā

'turāb' us ko ik dam na tū bhuul jaanā

bharosa hai piirī meñ kyā zindagī kā

jawani talak lutf tha zindagi ka

buDhape ne khoya maza zindagi ka

na tujh se mila jo yahan jite jite

use umr bhar gham raha zindagi ka

masiha-nafas tujh ko kahte hain aashiq

tere dam se hi aasra zindagi ka

suna de use qum-bi-izni ka naghma

dikha de zara moajiza zindagi ka

jo duniya mein rah ke hua haq se ghafil

natija use kya mila zindagi ka

bahaar aai phir bulbulen ji uThengi

sunati hai muzda saba zindagi ka

'turab' us ko ek dam na tu bhul jaana

bharosa hai piri mein kya zindagi ka