allah agar taufiq na de insan ke bas ka kaam nahin

allāh agar taufīq na de insāñ ke bas kā kaam nahīñ

faizān-e-mohabbat aam sahī irfān-e-mohabbat aam nahīñ

ye tū ne kahā kyā ai nādāñ fayyāzī-e-qudrat aam nahīñ

tū fikr-o-nazar to paidā kar kyā chiiz hai jo in.aam nahīñ

yārab ye maqām-e-ishq hai kyā go dīda-o-dil nākām nahīñ

taskīn hai aur taskīn nahīñ ārām hai aur ārām nahīñ

kyuuñ mast-e-sharāb-e-aish-o-tarab taklīf-e-tavajjoh farmā.eñ

āvāz-e-shikast-e-dil hī to hai āvāz-e-shikast-e-jām nahīñ

aanā hai jo bazm-e-jānāñ meñ pindār-e-ḳhudī ko toḌ ke aa

ai hosh-o-ḳhirad ke dīvāne yaañ hosh-o-ḳhirad kā kaam nahīñ

zāhid ne kuchh us andāz se pī saaqī kī nigāheñ paḌne lagīñ

mai-kash yahī ab tak samjhe the shā.ista daur-e-jām nahīñ

ishq aur gavārā ḳhud kar le be-shart shikast-e-fāsh apnī

dil kī bhī kuchh un ke sāzish hai tanhā ye nazar kā kaam nahīñ

sab jis ko asīrī kahte haiñ vo to hai amīrī hī lekin

vo kaun sī āzādī hai yahāñ jo aap ḳhud apnā daam nahīñ

allah agar taufiq na de insan ke bas ka kaam nahin

faizan-e-mohabbat aam sahi irfan-e-mohabbat aam nahin

ye tu ne kaha kya ai nadan fayyazi-e-qudrat aam nahin

tu fikr-o-nazar to paida kar kya chiz hai jo inam nahin

yarab ye maqam-e-ishq hai kya go dida-o-dil nakaam nahin

taskin hai aur taskin nahin aaram hai aur aaram nahin

kyun mast-e-sharab-e-aish-o-tarab taklif-e-tawajjoh farmaen

aawaz-e-shikast-e-dil hi to hai aawaz-e-shikast-e-jam nahin

aana hai jo bazm-e-jaanan mein pindar-e-KHudi ko toD ke aa

ai hosh-o-KHirad ke diwane yan hosh-o-KHirad ka kaam nahin

zahid ne kuchh us andaz se pi saqi ki nigahen paDne lagin

mai-kash yahī ab tak samjhe the shaista daur-e-jam nahin

ishq aur gawara KHud kar le be-shart shikast-e-fash apni

dil ki bhi kuchh un ke sazish hai tanha ye nazar ka kaam nahin

sab jis ko asiri kahte hain wo to hai amiri hi lekin

wo kaun si aazadi hai yahan jo aap KHud apna dam nahin