KHataon se pahle pashemaniyan hain

ḳhatāoñ se pahle pashemāniyāñ haiñ

mohabbat kī ma.asūm nādāniyāñ haiñ

qayāmat tirī jalva-sāmāniyāñ haiñ

jidhar dekhtā huuñ pareshāniyāñ haiñ

dil-o-jān-o-hasrat haiñ qurbāniyāñ haiñ

ḳhushā vo ki jis kī ye mehmāniyāñ haiñ

musalsal ġham-o-dard pachhtā rahā huuñ

pashemāniyoñ kī pashemāniyāñ haiñ

azal kī jo dil ke muqaddar paḌī thiiñ

vahī aaj tak sho.ala-sāmāniyāñ haiñ

diloñ par hukūmat nigāhoñ se parde

jahāñbāniyāñ haiñ sitam-rāniyāñ haiñ

tajassus meñ shāmil tahayyur meñ pinhāñ

nazar-soziyāñ haiñ nigahbāniyāñ haiñ

vo dushvāriyāñ ishq kī hal ho kyūñkar

jo dushvāriyāñ haiñ na āsāniyāñ haiñ

mohabbat ke jalve nahīñ husn se kam

unheñ bhī mire saath hairāniyāñ haiñ

tire jalva-o-juzv-e-kul ke tasadduq

na ab hasrateñ haiñ na hairāniyāñ haiñ

ġhazab meñ phañsī haiñ merā saath de kar

pareshāniyoñ ko pareshāniyāñ haiñ

dar-e-but-kada aur sajdoñ pe sajde

'jigar' vaah kyā kufr-sāmāniyāñ haiñ

KHataon se pahle pashemaniyan hain

mohabbat ki masum nadaniyan hain

qayamat teri jalwa-samaniyan hain

jidhar dekhta hun pareshaniyan hain

dil-o-jaan-o-hasrat hain qurbaniyan hain

KHusha wo ki jis ki ye mehmaniyan hain

musalsal gham-o-dard pachhta raha hun

pashemaniyon ki pashemaniyan hain

azal ki jo dil ke muqaddar paDi thin

wahi aaj tak shoala-samaniyan hain

dilon par hukumat nigahon se parde

jahanbaniyan hain sitam-raniyan hain

tajassus mein shamil tahayyur mein pinhan

nazar-soziyan hain nigahbaniyan hain

wo dushwariyan ishq ki hal ho kyunkar

jo dushwariyan hain na aasaniyan hain

mohabbat ke jalwe nahin husn se kam

unhen bhi mere sath hairaniyan hain

tere jalwa-o-juzw-e-kul ke tasadduq

na ab hasraten hain na hairaniyan hain

ghazab mein phansi hain mera sath de kar

pareshaniyon ko pareshaniyan hain

dar-e-but-kada aur sajdon pe sajde

'jigar' wah kya kufr-samaniyan hain