mohabbat hain jidhar dekho bahaar-e-jawedani hai

mohabbat haiñ jidhar dekho bahār-e-jāvedānī hai

hujūm-e-rañg-o-bū hai husn-e-naġhma hai javānī hai

junūn-e-ishq meñ hāsil ye lutf-e-zindagānī hai

nazar ko dil se aur dil ko nazar se bad-gumānī hai

tire sar kī qasam tujh sā hī ik mahbūb-e-sānī hai

yahī naqsha yahī andāz aisī hī javānī hai

ḳhudā-yā ḳhair karnā nabz bīmār-e-mohabbat kī

ka.ī din se bahut barham mizāj-e-nā-tavānī hai

kisī ko aaj majbūr-e-tarannum kar bhī de ai dil

bahut muddat huī ḳhāmosh sāz-e-lan-tarānī hai

tujhe ai ishq siine se lagāuñ dīda-o-dil hai

tire har dard meñ pinhāñ nashāt-e-jāvedānī hai

ye batlā aur kuchh tere sivā kaunain meñ bhī hai

ye maanā jo bhī hai tere sivā ai dost faanī hai

na kar ālūda-e-lafz-o-bayāñ sharh-e-mohabbat ko

mohabbat hī bajā-e-ḳhud zabān-e-be-zabānī hai

tire husn-e-hayāt-afroz ko dekhā hai jis din se

bahut mujh ko aziiz us din se apnī zindagānī hai

ilāhī sharm tere haath hai ādāb-e-mahfil kī

vo nāzuk-tab.a mehmāñ hai junūñ kī mehmānī hai

liye phirtā huuñ ik tasvīr-e-hast apnī āñkhoñ meñ

ḳhudā baḳhshe dil-e-marhūm kī zinda nishānī hai

inheñ aañsū samajh kar yuuñ na miTTī meñ milā zālim

payām-e-dard-o-dil hai aur āñkhoñ kī zabānī hai

tire jaur-e-musalsal kī qasam o pūchhne vaale

'jigar' ke haal par terā karam hai mehrbānī hai

mohabbat hain jidhar dekho bahaar-e-jawedani hai

hujum-e-rang-o-bu hai husn-e-naghma hai jawani hai

junun-e-ishq mein hasil ye lutf-e-zindagani hai

nazar ko dil se aur dil ko nazar se bad-gumani hai

tere sar ki qasam tujh sa hi ek mahbub-e-sani hai

yahī naqsha yahī andaz aisi hi jawani hai

KHuda-ya KHair karna nabz bimar-e-mohabbat ki

kai din se bahut barham mizaj-e-na-tawani hai

kisi ko aaj majbur-e-tarannum kar bhi de ai dil

bahut muddat hui KHamosh saz-e-lan-tarani hai

tujhe ai ishq sine se lagaun dida-o-dil hai

tere har dard mein pinhan nashat-e-jawedani hai

ye batla aur kuchh tere siwa kaunain mein bhi hai

ye mana jo bhi hai tere siwa ai dost fani hai

na kar aaluda-e-lafz-o-bayan sharh-e-mohabbat ko

mohabbat hi baja-e-KHud zaban-e-be-zabani hai

tere husn-e-hayat-afroz ko dekha hai jis din se

bahut mujh ko aziz us din se apni zindagani hai

ilahi sharm tere hath hai aadab-e-mahfil ki

wo nazuk-taba mehman hai junun ki mehmani hai

liye phirta hun ek taswir-e-hast apni aankhon mein

KHuda baKHshe dil-e-marhum ki zinda nishani hai

inhen aansu samajh kar yun na miTTi mein mila zalim

payam-e-dard-o-dil hai aur aankhon ki zabani hai

tere jaur-e-musalsal ki qasam o puchhne wale

'jigar' ke haal par tera karam hai mehrbani hai