wo kafir aashna na-ashna yun bhi hai aur yun bhi

vo kāfir āshnā nā-āshnā yuuñ bhī hai aur yuuñ bhī

hamāri ibtidā tā-intihā yuuñ bhī hai aur yuuñ bhī

ta.ajjub kyā agar rasm-e-vafā yuuñ bhī hai aur yuuñ bhī

ki husn-o-ishq kā har musalmāñ yuuñ bhī hai aur yuuñ bhī

kahīñ zarra kahīñ sahrā kahīñ qatra kahīñ dariyā

mohabbat aur us kā silsila yuuñ bhī hai aur yuuñ bhī

vo mujh se pūchhte haiñ ek maqsad merī hastī kā

batā.ūñ kyā ki merā mudda.ā yuuñ bhī hai aur yuuñ bhī

ham un se kyā kaheñ vo jāneñ un kī maslahat jaane

hamārā hāl-e-dil to barmalā yuuñ bhī hai aur yuuñ bhī

na pā lenā tarā āsāñ na kho denā tarā mumkin

musībat meñ ye jān-e-mubtalā yuuñ bhī hai aur yuuñ bhī

ilāhī kis tarah aql-o-junūñ ko ek jā kar luuñ

ki manshā-e-nigāh ishva-zā yuuñ bhī hai aur yuuñ bhī

majāzī se 'jigar' kah do are o aqal ke dushman

muqir ho yā koī munkir ḳhudā yuuñ bhī hai aur yuuñ bhī

wo kafir aashna na-ashna yun bhi hai aur yun bhi

hamari ibtida ta-intiha yun bhi hai aur yun bhi

tajjub kya agar rasm-e-wafa yun bhi hai aur yun bhi

ki husn-o-ishq ka har musalman yun bhi hai aur yun bhi

kahin zarra kahin sahra kahin qatra kahin dariya

mohabbat aur us ka silsila yun bhi hai aur yun bhi

wo mujh se puchhte hain ek maqsad meri hasti ka

bataun kya ki mera muddaa yun bhi hai aur yun bhi

hum un se kya kahen wo jaanen un ki maslahat jaane

hamara haal-e-dil to barmala yun bhi hai aur yun bhi

na pa lena tara aasan na kho dena tara mumkin

musibat mein ye jaan-e-mubtala yun bhi hai aur yun bhi

ilahi kis tarah aql-o-junun ko ek ja kar lun

ki mansha-e-nigah ishwa-za yun bhi hai aur yun bhi

majazi se 'jigar' kah do are o aqal ke dushman

muqir ho ya koi munkir KHuda yun bhi hai aur yun bhi