ji bahalta hi nahin sans ki jhankaron se

jī bahaltā hī nahīñ saañs kī jhankāroñ se

phoḌ luuñ sar na kahīñ jism kī dīvāroñ se

apne riste hue zaḳhmoñ pe chhiḌak letā huuñ

raakh jhaḌtī hai jo ehsās ke añgāroñ se

giit gā.ūñ to lapak jaate haiñ sho.ale dil meñ

saaz chheḌūñ to nikaltā hai dhuāñ tāroñ se

kāsa-e-sar liye phirtī haiñ vafā.eñ ab bhī

ab bhī teshoñ kī sadā aatī hai kohsāroñ se

zinda lāsheñ bhī dukānoñ meñ sajī haiñ shāyad

bū-e-ḳhūñ aatī hai khulte hue bāzāroñ se

kyā mire aks meñ chhup jā.eñge un ke chehre

itnā pūchhe koī un ā.ina-bardāroñ se

pyaar har-chand jhalaktā hai un āñkhoñ se magar

zaḳhm bharte haiñ 'muzaffar' kahīñ talvāroñ se

ji bahalta hi nahin sans ki jhankaron se

phoD lun sar na kahin jism ki diwaron se

apne riste hue zaKHmon pe chhiDak leta hun

rakh jhaDti hai jo ehsas ke angaron se

git gaun to lapak jate hain shoale dil mein

saz chheDun to nikalta hai dhuan taron se

kasa-e-sar liye phirti hain wafaen ab bhi

ab bhi teshon ki sada aati hai kohsaron se

zinda lashen bhi dukanon mein saji hain shayad

bu-e-KHun aati hai khulte hue bazaron se

kya mere aks mein chhup jaenge un ke chehre

itna puchhe koi un aaina-bardaron se

pyar har-chand jhalakta hai un aankhon se magar

zaKHm bharte hain 'muzaffar' kahin talwaron se