jis ko dekho wo nazar aata hai diwana tera

jis ko dekho vo nazar aatā hai dīvāna tirā

vaah kyā andāz hai ai chashm-e-masatāna tirā

ai hasīñ jalva hai har-sū be-hijābāna tirā

zarra zarra kah rahā hai mujh se afsāna tirā

gul tire gulshan hai terā sab bahāreñ haiñ terī

āshiyān-o-barq sab kahte haiñ afsāna tirā

lutf us kā hai ḳhumār us kā hai mastī us kī hai

pī liyā jis ne azal ke rose paimāna tirā

ab kamī kyā hai mire saaqī pilā.e jā mujhe

shīsha terā mai tirī hai jām-o-mai-ḳhāna tirā

tū ne kuchh aisī pilā.ī ai nigāh-e-chashm-e-dost

roz-e-avval se tirā 'qaisar' hai mastāna tirā

jis ko dekho wo nazar aata hai diwana tera

wah kya andaz hai ai chashm-e-masatana tera

ai hasin jalwa hai har-su be-hijabana tera

zarra zarra kah raha hai mujh se afsana tera

gul tere gulshan hai tera sab bahaaren hain teri

aashiyan-o-barq sab kahte hain afsana tera

lutf us ka hai KHumar us ka hai masti us ki hai

pi liya jis ne azal ke rose paimana tera

ab kami kya hai mere saqi pilae ja mujhe

shisha tera mai teri hai jam-o-mai-KHana tera

tu ne kuchh aisi pilai ai nigah-e-chashm-e-dost

roz-e-awwal se tera 'qaisar' hai mastana tera