jis tarah diwana ai dil tu hua

jis tarah dīvāna ai dil tū huā

majnūñ aisā kam koī aaqil huā

ishq meñ jis ke gayā maiñ sab ko bhuul

yaad se merī vo kyuuñ ġhāfil huā

chheḌte haiñ sab dīvāna jaan ke

raah chalnā mujh par ab mushkil huā

jis se maiñ ro-ro ke ye kahtā huuñ haif

faqr meñ aisā maiñ nā-qābil huā

phañs gayā dil zulf meñ ik shoḳh ke

pī ke jām-e-ishq lā-yā'qil huā

dekh paḌtā hai vahī ab sabab kahīñ

bāvajūd-e-ilm yuuñ jāhil huā

hañs ke vo mujh se yahī kahtā hai vaah

tū to apne fan meñ ab kāmil huā

ishq meñ jaisā tū be-dil hai 'turāb'

jag meñ aisā kaun sāhib dil huā

jis tarah diwana ai dil tu hua

majnun aisa kam koi aaqil hua

ishq mein jis ke gaya main sab ko bhul

yaad se meri wo kyun ghafil hua

chheDte hain sab diwana jaan ke

rah chalna mujh par ab mushkil hua

jis se main ro-ro ke ye kahta hun haif

faqr mein aisa main na-qabil hua

phans gaya dil zulf mein ek shoKH ke

pi ke jam-e-ishq la-ya'qil hua

dekh paDta hai wahi ab sabab kahīñ

bawajud-e-ilm yun jahil hua

hans ke wo mujh se yahi kahta hai wah

tu to apne fan mein ab kaamil hua

ishq mein jaisa tu be-dil hai 'turab'

jag mein aisa kaun sahib dil hua