جس طرح دیوانہ اے دل تو ہوا

جس طرح دیوانہ اے دل تو ہوا

مجنوں ایسا کم کوئی عاقل ہوا

عشق میں جس کے گیا میں سب کو بھول

یاد سے میری وہ کیوں غافل ہوا

چھیڑتے ہیں سب دیوانہ جان کے

راہ چلنا مجھ پر اب مشکل ہوا

جس سے میں رو رو کے یہ کہتا ہوں حیف

فقر میں ایسا میں نا قابل ہوا

پھنس گیا دل زلف میں اک شوخ کے

پی کے جام عشق لا یعقل ہوا

دیکھ پڑتا ہے وہی اب سبب سے

باوجود علم یوں جاہل ہوا

ہنس کے وہ مجھ سے یہی کہتا ہے واہ

تو تو اپنے فن میں اب کامل ہوا

عشق میں جیسا تو بیدل ہے ترابؔ

جگ میں ایسا کون صاحب دل ہوا