jise tum ghair samjhe ho use hum yar kahte hain

jise tum ġhair samjhe ho use ham yaar kahte haiñ

jahāñ ko ham sarāsar jalva-e-dīdār kahte haiñ

na ho jis gul meñ terī bū use ham ḳhaar kahte haiñ

jahāñ tū jalva-gar hove use gulzār kahte haiñ

adā jis haal meñ nikle use raftār kahte haiñ

suḳhan jo jī ko le jaave use guftār kahte haiñ

sanad mansūr kī hai ye hameñ rāh-e-mohabbat meñ

sar-e-dār aa.e jis kā sar use sardār kahte haiñ

agar dil saaf hai kab koī hai dīdār kā maan.e

jo hove sadd-e-rāh-e-yār use dīvār kahte haiñ

kaTī shab intizār-e-yār meñ par kuchh nahīñ dekhā

nahīñ ma'alūm kis ko daulat-e-bedār kahte haiñ

nigāh-e-mast terī kis qadar ḳhūñ-rez 'ālam hai

'abas āñkhoñ ko tere nargis-e-bīmār kahte haiñ

faqat zāhid kī kaj-fahmī thī varna kuchh thā qaziyya

vo mehrābeñ kahe ham abrū-e-ḳham-dār kahte haiñ

nahīñ hai apnā sheva shā.irī kā 'fard' par ham ne

kiyā nazr-e-niyāz un kī jo be-ash'ār kahte haiñ

jise tum ghair samjhe ho use hum yar kahte hain

jahan ko hum sarasar jalwa-e-didar kahte hain

na ho jis gul mein teri bu use hum KHar kahte hain

jahan tu jalwa-gar howe use gulzar kahte hain

ada jis haal mein nikle use raftar kahte hain

suKHan jo ji ko le jawe use guftar kahte hain

sanad mansur ki hai ye hamein rah-e-mohabbat mein

sar-e-dar aae jis ka sar use sardar kahte hain

agar dil saf hai kab koi hai didar ka mane

jo howe sadd-e-rah-e-yar use diwar kahte hain

kaTi shab intizar-e-yar mein par kuchh nahin dekha

nahin ma'alum kis ko daulat-e-bedar kahte hain

nigah-e-mast teri kis qadar KHun-rez 'alam hai

'abas aankhon ko tere nargis-e-bimar kahte hain

faqat zahid ki kaj-fahmi thi warna kuchh tha qaziyya

wo mehraben kahe hum abru-e-KHam-dar kahte hain

nahin hai apna shewa shairi ka 'fard' par hum ne

kiya nazr-e-niyaz un ki jo be-ash'ar kahte hain