jo hui so hui jaane do milo bismillah

jo huī so huī jaane do milo bismillāh

jām-e-mai haath se lo mere piyo bismillāh

muntazir aap ke aane kā ka.ī din se huuñ

kyā hai tāḳhīr qadam-ranja karo bismillāh

le chuke dil to phir ab kyā hai sabab ranjish kā

jī bhī hāzir hai jo lete ho to lo bismillāh

maiñ to huuñ kushta-e-abrū-e-but-e-mus.haf-e-rū

mū-qalam se mire turbat pe likho bismillāh

zab.h karnā hī mujhe tum ko hai manzūr agar

maiñ bhī hāzir huuñ mirī jaan uTho bismillāh

hote āzurda ho aane se hamāre jo tum

ḳhush raho mat ho ḳhafā ham chale lo bismillāh

ain rāhat hai mujhe banda-navāzā is meñ

qadam āñkhoñ pe mirī aa ke rakho bismillāh

jin kī rahte ho shab-o-roz tum ab sohbat meñ

jaao ai jaan ab un ke hī raho bismillāh

mast niklā hai mai-e-husn meñ 'bedār' vo shoḳh

dekhnā gar na paḌe kahte chalo bismillāh

jo hui so hui jaane do milo bismillah

jam-e-mai hath se lo mere piyo bismillah

muntazir aap ke aane ka kai din se hun

kya hai taKHir qadam-ranja karo bismillah

le chuke dil to phir ab kya hai sabab ranjish ka

ji bhi hazir hai jo lete ho to lo bismillah

main to hun kushta-e-abru-e-but-e-mushaf-e-ru

mu-qalam se mere turbat pe likho bismillah

zabh karna hi mujhe tum ko hai manzur agar

main bhi hazir hun meri jaan uTho bismillah

hote aazurda ho aane se hamare jo tum

KHush raho mat ho KHafa hum chale lo bismillah

ain rahat hai mujhe banda-nawaza is mein

qadam aankhon pe meri aa ke rakho bismillah

jin ki rahte ho shab-o-roz tum ab sohbat mein

jao ai jaan ab un ke hi raho bismillah

mast nikla hai mai-e-husn mein 'bedar' wo shoKH

dekhna gar na paDe kahte chalo bismillah