jo na kabe mein hai mahdud na but-KHane mein

jo na ka.abe meñ hai mahdūd na but-ḳhāne meñ

haaye vo idrāk ujḌe hue kāshāne meñ

miltī hai umr-e-abad ishq ke mai-ḳhāne meñ

ai ajal tū bhī samā jā mire paimāne meñ

ham kahīñ aate haiñ vaa.iz tire bahkāne meñ

usī mai-ḳhāne kī miTTī usī mai-ḳhāne meñ

sab kuchh allāh ne de rakhā hai mai-ḳhāne meñ

ḳhuld shīshe meñ hai firdaus hai paimāne meñ

baam par aake uThā do ruḳh-e-tābāñ se naqāb

ik izāfa hī sahī tuur ke afsāne meñ

aaj to kar diyā saaqī ne mujhe mast-e-alast

Daal kar ḳhaas nigāheñ mire paimāne meñ

aaj saaqī ne ye kyā haal banā rakhā hai

kabhī mai-ḳhāne se bāhar kabhī mai-ḳhāne meñ

aap dekheñ to sahī rabt-e-mohabbat kyā hai

apnā afsāna milā kar mire afsāne meñ

hajv ne terā ai shaiḳh bhram khol diyā

tū to masjid meñ hai niyyat tirī mai-ḳhāne meñ

mashvare hote haiñ jo shaiḳh-o-barhaman meñ 'jigar'

rind sun lete haiñ baiThe ho.e mai-ḳhāne meñ

jo na kabe mein hai mahdud na but-KHane mein

haye wo idrak ujDe hue kashane mein

milti hai umr-e-abad ishq ke mai-KHane mein

ai ajal tu bhi sama ja mere paimane mein

hum kahin aate hain waiz tere bahkane mein

usi mai-KHane ki miTTi usi mai-KHane mein

sab kuchh allah ne de rakha hai mai-KHane mein

KHuld shishe mein hai firdaus hai paimane mein

baam par aake uTha do ruKH-e-taban se naqab

ek izafa hi sahi tur ke afsane mein

aaj to kar diya saqi ne mujhe mast-e-alast

Dal kar KHas nigahen mere paimane mein

aaj saqi ne ye kya haal bana rakha hai

kabhi mai-KHane se bahar kabhi mai-KHane mein

aap dekhen to sahi rabt-e-mohabbat kya hai

apna afsana mila kar mere afsane mein

hajw ne tera ai shaiKH bhram khol diya

tu to masjid mein hai niyyat teri mai-KHane mein

mashware hote hain jo shaiKH-o-barhaman mein 'jigar'

rind sun lete hain baiThe hoe mai-KHane mein