jo the hath mehndi lagane ke qabil

jo the haath mehñdī lagāne ke qābil

hue aaj ḳhanjar uThāne ke qābil

anādil bhī kaliyāñ bhī gul bhī sabā bhī

ye sohbat hai hañsne hañsāne ke qābil

hinā ban ke maiñ chuum luuñ dast-e-nāzuk

tire haath meñ rañg laane ke qābil

javānī kā ab rañg kuchh aa chalā hai

vo ab ho chale haiñ satāne ke qābil

mujhe dekh kar duḳht-e-raz tan rahī hai

ye khīñch kar huī hai uḌāne ke qābil

qayāmat meñ dekheñge kyūñ-kar unheñ ham

nahīñ sharm se aañkh uThāne ke qābil

banā.eñ na ab us ko ab sham.a-e-mahfil

jalā dil nahīñ hai jalāne ke qābil

chaman meñ uḌā un ko ai bād-e-sarsar

mare TuuTe par haiñ uḌāne ke qābil

bane sho.ale bijlī ke qismat se merī

jo tinke the kuchh āshiyāne ke qābil

buḌhāpe meñ sābit hue duzd-e-mai ham

na aane ke qābil na jaane ke qābil

ye kahtī hai hazrat kī rīsh-e-hinā.ī

'riyāz' ab bhī haiñ rañg laane ke qābil

jo the hath mehndi lagane ke qabil

hue aaj KHanjar uThane ke qabil

anadil bhi kaliyan bhi gul bhi saba bhi

ye sohbat hai hansne hansane ke qabil

hina ban ke main chum lun dast-e-nazuk

tere hath mein rang lane ke qabil

jawani ka ab rang kuchh aa chala hai

wo ab ho chale hain satane ke qabil

mujhe dekh kar duKHt-e-raz tan rahi hai

ye khinch kar hui hai uDane ke qabil

qayamat mein dekhenge kyun-kar unhen hum

nahin sharm se aankh uThane ke qabil

banaen na ab us ko ab shama-e-mahfil

jala dil nahin hai jalane ke qabil

chaman mein uDa un ko ai baad-e-sarsar

mare TuTe par hain uDane ke qabil

bane shoale bijli ke qismat se meri

jo tinke the kuchh aashiyane ke qabil

buDhape mein sabit hue duzd-e-mai hum

na aane ke qabil na jaane ke qabil

ye kahti hai hazrat ki rish-e-hinai

'riyaz' ab bhi hain rang lane ke qabil