jo wo nazar basar-e-lutf-e-am ho jae

jo vo nazar basar-e-lutf-e-ām ho jaa.e

ajab nahīñ ki hamārā bhī kaam ho jaa.e

sharāb-e-shauq kī qīmat hai naqd-e-jān-e-azīz

agar ye bā.is-e-kaif-e-davām ho jaa.e

rahīn-e-yās raheñ ahal-e-ārzū kab tak

kabhī to aap kā darbār-e-ām ho jaa.e

jo aur kuchh ho tirī diid ke sivā manzūr

to mujh pe ḳhvāhish-e-jannat harām ho jaa.e

vo duur hī se hameñ dekh leñ yahī hai bahut

magar qubūl hamārā salām ho jaa.e

agar vo husn-e-dil-ārā kabhī ho jalva-farosh

faroġh-e-nūr meñ gum zarf-e-bām ho jaa.e

sunā hai bar-sar-e-baḳhshish hai aaj pīr-e-muġhāñ

hameñ bhī kaash atā koī jaam ho jaa.e

tire karam pe hai mauqūf kāmrāni-e-shauq

ye nā-tamām ilāhī tamām ho jaa.e

sitam ke ba.ad karam hai jafā ke ba.ad atā

hameñ hai bas jo yahī ho ho jaa.e

jo wo nazar basar-e-lutf-e-am ho jae

ajab nahin ki hamara bhi kaam ho jae

sharab-e-shauq ki qimat hai naqd-e-jaan-e-aziz

agar ye bais-e-kaif-e-dawam ho jae

rahin-e-yas rahen ahal-e-arzu kab tak

kabhi to aap ka darbar-e-am ho jae

jo aur kuchh ho teri did ke siwa manzur

to mujh pe KHwahish-e-jannat haram ho jae

wo dur hi se hamein dekh len yahi hai bahut

magar qubul hamara salam ho jae

agar wo husn-e-dil-ara kabhi ho jalwa-farosh

farogh-e-nur mein gum zarf-e-baam ho jae

suna hai bar-sar-e-baKHshish hai aaj pir-e-mughan

hamein bhi kash ata koi jam ho jae

tere karam pe hai mauquf kaamrani-e-shauq

ye na-tamam ilahi tamam ho jae

sitam ke baad karam hai jafa ke baad ata

hamein hai bas jo yahi ho ho jae