junun mein ek din Danka baje ga josh-e-iman ka

junūñ meñ ek din Dañkā baje gā josh-e-īmāñ kā

hai il-lallāh āvāza mire chāk-e-garebāñ kā

varaq mujh jo haath aa jaa.e ḳhurshīd-e-daraḳhshāñ kā

to likhūñ vasf rū-e-pāk kuchh mahbūb-e-yazdāñ kā

ḳhayāl-e-tan na phir aayā jo niklī ruuh qālib se

rihā ho kar nā dekhā ḳhvāb bhī yūsuf ne zindāñ kā

kisī kā sān.e.a kaunain khīñche gā magar naqsha

varaq saada paḌā hai aaj tak mehr-e-daraḳhshāñ kā

ajab shādāb hai lākhoñ gul-e-zaḳhm is meñ khilte haiñ

nihāl-e-dil mirā sīñchā huā hai āb-e-paikāñ kā

hue arbāb-e-mahfil ḳhush ḳhudā ne aabrū rakh lī

ki thā 'shoq'-e-imtahāñ us dam tirī tab.a-e-suḳhn-dāñ kā

junun mein ek din Danka baje ga josh-e-iman ka

hai il-lallah aawaza mere chaak-e-gareban ka

waraq mujh jo hath aa jae KHurshid-e-daraKHshan ka

to likhun wasf ru-e-pak kuchh mahbub-e-yazdan ka

KHayal-e-tan na phir aaya jo nikli ruh qalib se

riha ho kar na dekha KHwab bhi yusuf ne zindan ka

kisi ka sanea kaunain khinche ga magar naqsha

waraq sada paDa hai aaj tak mehr-e-daraKHshan ka

ajab shadab hai lakhon gul-e-zaKHm is mein khilte hain

nihaal-e-dil mera sincha hua hai aab-e-paikan ka

hue arbab-e-mahfil KHush KHuda ne aabru rakh li

ki tha 'shoq'-e-imtahan us dam teri taba-e-suKHn-dan ka