جنوں میں ایک دن ڈنکا بجے گا جوش ایماں کا

جنوں میں ایک دن ڈنکا بجے گا جوش ایماں کا

ہے اِلا اللہ آوازہ مرے چاک گریباں کا

ورق مجھ کوجو ہاتھ آ جائے خورشید درخشاں کا

تو لکھوں وصف روئے پاک کچھ محبوب یزداں کا

خیال تن نہ پھر آیا جو نکلی روح قالب سے

رہا ہو کر نا دیکھا خواب بھی یوسف نے زنداں کا

کسی کا صانع کونین کھینچے گا مگر نقشہ

ورق سادہ پڑا ہے آج تک مہر درخشاں کا

عجب شاداب ہے لاکھوں گل زخم اس میں کھلتے ہیں

نہال دل مرا سینچا ہوا ہے آب پیکاں کا

ہوئے ارباب محفل خوش خدا نے آبرو رکھ لی

کہ تھا شوقؔ امتحاں اس دم تری طبع سخن داں کا