junun se kuchh nahin chaara kare kya qais bechaara

junūñ se kuchh nahīñ chāra kare kyā qais bechāra

barahna-pā barahna-sar phire hai ban meñ āvāra

na rotā hai na hañstā hai na kuchh kahtā na suntā hai

sharāb-e-ishq-e-lailā se huā mad.hosh yak-bārā

mohabbat jab huī ġhālib nahīñ chhuptī chhupāne se

fuġhān-o-āh-o-nāla hai tire āshiq kā naqqārā

vo us kī qadr kyā jaane ḳhudā-hāfiz maiñ Dartā huuñ

paḌā hai haath meñ laḌke ke mere dil kā sīpāra

hamāre mashrab-o-mazhab se zāhid ko ḳhabar kyā hai

vo tifl-e-shīr-ḳhvāra hai use hujra hai gahvārā

uThā le aañkh se merī tū nāseh āstīñ apnī

karegā tujh ko tar dāman mire aañsū kā favvāra

vo dil par mere dhar ke haath uf kar ke lagā kahne

huā hai ishq kī garmī se terā dil to añgāra

'turāb' us shaḳhs ko ham nek-o-ḳhush-auqāt kahte haiñ

ḳhudā kī yaad meñ jis ke kaTe auqāt hamvāra

junun se kuchh nahin chaara kare kya qais bechaara

barahna-pa barahna-sar phire hai ban mein aawara

na rota hai na hansta hai na kuchh kahta na sunta hai

sharab-e-ishq-e-laila se hua madhosh yak-bara

mohabbat jab hui ghaalib nahin chhupti chhupane se

fughan-o-ah-o-nala hai tere aashiq ka naqqara

wo us ki qadr kya jaane KHuda-hafiz main Darta hun

paDa hai hath mein laDke ke mere dil ka sipara

hamare mashrab-o-mazhab se zahid ko KHabar kya hai

wo tifl-e-shir-KHwara hai use hujra hai gahwara

uTha le aankh se meri tu naseh aastin apni

karega tujh ko tar daman mere aansu ka fawwara

wo dil par mere dhar ke hath uf kar ke laga kahne

hua hai ishq ki garmi se tera dil to angara

'turab' us shaKHs ko hum nek-o-KHush-auqat kahte hain

KHuda ki yaad mein jis ke kaTe auqat hamwara