kaam jo karna tha tujhko wo masiha kar diya

kaam jo karnā thā tujh ko vo masīhā kar diyā

maar Daalā ham ko duniyā bhar meñ zinda kar diyā

mar ga.e sab vo samajhte haiñ tasallī ho ga.ī

hañs ke kahte haiñ marīzoñ kā mudāvā kar diyā

kis qadar afsurda afsurda thā bāġh-e-kā.enāt

husn kī nairañgiyoñ ne rañg paidā kar diyā

ye taraf-dārī na thī to kyā thā qassam-e-azal

ham ko be-dil kar diyā un ko dil-ārā kar diyā

fātiha paḌhte rahe hañste rahe rote rahe

qabr par aa kar unhoñne qaul puurā kar diyā

der se bigḌe hue baiThe haiñ vo is baat par

kyuuñ mire bīmār ko iisā ne achchhā kar diyā

kyā samajh kar sham-e-rū-e-yār par tum ne 'jigar'

sūrat-e-parvāna dil qurbān apnā kar diyā

kaam jo karna tha tujh ko wo masiha kar diya

mar Dala hum ko duniya bhar mein zinda kar diya

mar gae sab wo samajhte hain tasalli ho gai

hans ke kahte hain marizon ka mudawa kar diya

kis qadar afsurda afsurda tha bagh-e-kaenat

husn ki nairangiyon ne rang paida kar diya

ye taraf-dari na thi to kya tha qassam-e-azal

hum ko be-dil kar diya un ko dil-ara kar diya

fatiha paDhte rahe hanste rahe rote rahe

qabr par aa kar unhonne qaul pura kar diya

der se bigDe hue baiThe hain wo is baat par

kyun mere bimar ko isa ne achchha kar diya

kya samajh kar sham-e-ru-e-yar par tum ne 'jigar'

surat-e-parwana dil qurban apna kar diya