kash hasil mujhe ye rang-e-tamasha hota

kaash hāsil mujhe ye rañg-e-tamāshā hotā

roz-o-shab sāmne terā ruḳh-e-zebā hotā

raunaqeñ ātīñ ḳhushī hotī nikalte armāñ

tum qadam rakhte mire ghar meñ to kyā kyā hotā

phir mujhe ishq meñ ma.azūr samajhtā nāseh

merī āñkhoñ se jo us ne tujhe dekhā hotā

mehmāñ hai koī dam kā ye tumhārā bīmār

tum bhī aa jaate jo bālīñ pe to achchhā hotā

yuuñ na Thukrāo agar de hī diyā dil tum ko

dil tumhārā jo na hotā to ye kis kā hotā

har ghaḌī us kī ma'iyyat kā tasavvur hai 'nasīr'

ye bhī hotā na mire saath to tanhā hotā

kash hasil mujhe ye rang-e-tamasha hota

roz-o-shab samne tera ruKH-e-zeba hota

raunaqen aatin KHushi hoti nikalte arman

tum qadam rakhte mere ghar mein to kya kya hota

phir mujhe ishq mein mazur samajhta naseh

meri aankhon se jo us ne tujhe dekha hota

mehman hai koi dam ka ye tumhaara bimar

tum bhi aa jate jo baalin pe to achchha hota

yun na Thukrao agar de hi diya dil tum ko

dil tumhaara jo na hota to ye kis ka hota

har ghaDi us ki ma'iyyat ka tasawwur hai 'nasir'

ye bhi hota na mere sath to tanha hota