kab nishan mera kisi ko shab-e-hasti mein mila

kab nishāñ merā kisī ko shab-e-hastī meñ milā

maiñ to jugnū kī tarah apnī hī muTThī meñ milā

bhaag niklā thā jo tūfāñ se chhuḌā kar dāman

sar-e-sāhil vahī Duubā huā kashtī meñ milā

aañkh raushan ho to duniyā ke añdhere kyā haiñ

rasta mahtāb ko rātoñ kī siyāhī meñ milā

maiñ jalātā rahā tere liye lamhoñ ke charāġh

tū guzartā huā sadiyoñ kī savārī meñ milā

tū ne mañgtoñ ko uchaTtī huī nazreñ bhī na diiñ

haath phailāyā na jis ne use jholī meñ milā

maiñ ik aañsū hī sahī huuñ bahut anmol magar

yuuñ na palkoñ se girā kar mujhe miTTī meñ milā

mahfiloñ meñ kiyā logoñ ne 'muzaffar' kī talāsh

vo bhaTaktā huā afkār kī vaadī meñ milā

kab nishan mera kisi ko shab-e-hasti mein mila

main to jugnu ki tarah apni hi muTThi mein mila

bhag nikla tha jo tufan se chhuDa kar daman

sar-e-sahil wahi Duba hua kashti mein mila

aankh raushan ho to duniya ke andhere kya hain

rasta mahtab ko raaton ki siyahi mein mila

main jalata raha tere liye lamhon ke charagh

tu guzarta hua sadiyon ki sawari mein mila

tu ne mangton ko uchaTti hui nazren bhi na din

hath phailaya na jis ne use jholi mein mila

main ek aansu hi sahi hun bahut anmol magar

yun na palkon se gira kar mujhe miTTi mein mila

mahfilon mein kiya logon ne 'muzaffar' ki talash

wo bhaTakta hua afkar ki wadi mein mila