kabhi husn-e-yar ka zikr hai kabhi daur-e-jam ki baat hai

kabhī husn-e-yār kā zikr hai kabhī daur-e-jām kī baat hai

ye hamārī sub.h kī guftugū vo hamārī shaam kī baat hai

jise aap kahte haiñ shash-jihat vo azal se hai mirī milkiyat

mire dil ne jis ko bhulā diyā ye us maqām kī baat hai

kahīñ raushnī kahīñ tīrgī jo kahīñ ḳhushī to kahīñ ġhamī

terī bazm meñ hameñ daḳhl kyā tire ehtimām kī baat hai

mirā har maqām pe tazkira mirā har zabān par tabsira

ye tumhārī zaat kā faiz hai ye tumhāre naam kī baat hai

vo namāz paḌhtā huuñ roz-o-shab ki 'azīz' jis pe fidā haiñ sab

na kahīñ sujūd kā zikr hai na kahīñ qiyām kī baat hai

kabhi husn-e-yar ka zikr hai kabhi daur-e-jam ki baat hai

ye hamari subh ki guftugu wo hamari sham ki baat hai

jise aap kahte hain shash-jihat wo azal se hai meri milkiyat

mere dil ne jis ko bhula diya ye us maqam ki baat hai

kahin raushni kahin tirgi jo kahin KHushi to kahin ghami

teri bazm mein hamein daKHl kya tere ehtimam ki baat hai

mera har maqam pe tazkira mera har zaban par tabsira

ye tumhaari zat ka faiz hai ye tumhaare nam ki baat hai

wo namaz paDhta hun roz-o-shab ki 'aziz' jis pe fida hain sab

na kahin sujud ka zikr hai na kahin qiyam ki baat hai