کبھی حسن یار کا ذکر ہے کبھی دور جام کی بات ہے

کبھی حسن یار کا ذکر ہے کبھی دور جام کی بات ہے

یہ ہماری صبح کی گفتگو وہ ہماری شام کی بات ہے

جسے آپ کہتے ہیں شش جہت وہ ازل سے ہے مری ملکیت

مرے دل نے جس کو بھلا دیا یہ اس مقام کی بات ہے

کہیں روشنی کہیں تیرگی جو کہیں خوشی تو کہیں غمی

تیری بزم میں ہمیں دخل کیا ترے اہتمام کی بات ہے

مرا ہر مقام پہ تذکرہ مرا ہر زبان پر تبصرہ

یہ تمہاری ذات کا فیض ہے یہ تمہارے نام کی بات ہے

وہ نماز پڑھتا ہوں روز و شب کہ عزیزؔ جس پہ فدا ہیں سب

نہ کہیں سجود کا ذکر ہے نہ کہیں قیام کی بات ہے