kabhi tanhai-e-manzil se jo ghabraata hun

kabhī tanhā.ī-e-manzil se jo ghabrātā huuñ

un kī āvāz ye aatī hai ki maiñ aatā huuñ

be-ḳhudī kī yahī takmīl hai shāyad ai dost

tū jo aatā hai to maiñ hosh meñ aa jaatā huuñ

ye tirā dar bhī hai ka.aba bhī hai but-ḳhāna bhī

sajde kartā huā maiñ sab ko yahīñ paatā huuñ

tuur ḳhāmosh sahī jalve to ḳhāmosh nahīñ

bijliyāñ kauñdtī paatā huuñ jidhar jaatā huuñ

ab use DhūñDne vaalā nahīñ bhaTkegā koī

maiñ rah-e-dost meñ ik naqsh banā jaatā huuñ

kaun āvāz diye jaatā hai mujh ko 'qaisar'

ki maiñ har gaam pe kahtā huuñ abhī aatā huuñ

kabhi tanhai-e-manzil se jo ghabraata hun

un ki aawaz ye aati hai ki main aata hun

be-KHudi ki yahi takmil hai shayad ai dost

tu jo aata hai to main hosh mein aa jata hun

ye tera dar bhi hai kaba bhi hai but-KHana bhi

sajde karta hua main sab ko yahin pata hun

tur KHamosh sahi jalwe to KHamosh nahin

bijliyan kaundti pata hun jidhar jata hun

ab use DhunDne wala nahin bhaTkega koi

main rah-e-dost mein ek naqsh bana jata hun

kaun aawaz diye jata hai mujh ko 'qaisar'

ki main har gam pe kahta hun abhi aata hun