kahen tujhse kya hum ki kya jaante the

kaheñ tujh se kyā ham ki kyā jānte the

ḳhudā-vand mere ḳhudā jānte the

salām-o-du'ā aage likhte the ham bhī

tujhe aap se jab judā jānte the

na thiiñ ḳhūbiyāñ jab talak terī zāhir

tujhe aap se āshnā jānte the

jafāon se shākī jo hote na the ham

mirī jaan terī adā jānte the

lagāvaT jo thī ham se dil se na thī vo

miyāñ ham bhī ye mudda'ā jānte the

tire 'ishq se laag thī dil ko jab tak

dam apne ko hamdam huā jānte the

kahen tujh se kya hum ki kya jaante the

KHuda-wand mere KHuda jaante the

salam-o-du'a aage likhte the hum bhi

tujhe aap se jab juda jaante the

na thin KHubiyan jab talak teri zahir

tujhe aap se aashna jaante the

jafaon se shaki jo hote na the hum

meri jaan teri ada jaante the

lagawaT jo thi hum se dil se na thi wo

miyan hum bhi ye mudda'a jaante the

tere 'ishq se lag thi dil ko jab tak

dam apne ko hamdam hua jaante the