کہیں تجھ سے کیا ہم کہ کیا جانتے تھے

کہیں تجھ سے کیا ہم کہ کیا جانتے تھے

خدا وند میرے خدا جانتے تھے

سلام و دعا آگے لکھتے تھے ہم بھی

تجھے آپ سے جب جدا جانتے تھے

نہ تھیں خوبیاں جب تلک تیری ظاہر

تجھے آپ سے آشنا جانتے تھے

جفاؤں سے شاکی جو ہوتے نہ تھے ہم

مری جان تیری ادا جانتے تھے

لگاوٹ جو تھی ہم سے دل سے نہ تھی وہ

میاں ہم بھی یہ مدعا جانتے تھے

ترے عشق سے لاگ تھی دل کو جب تک

دم اپنے کو ہمدم ہوا جانتے تھے