kahun kya wahshat-e-virana-paimai kahan tak hai

kahūñ kyā vahshat-e-vīrāna-paimā.ī kahāñ tak hai

ki vus.at mere sahrā kī makāñ se lā-makāñ tak hai

agar chāhūñ nizām-e-dahr ko zer-o-zabar kar duuñ

mire jazbāt kā tūfāñ zamīñ se āsmāñ tak hai

tere miTne meñ ai dil zindagī kā raaz muzmar hai

hrās-e-niyyatī āġhāz-e-vaqt-e-imtihāñ tak hai

satātā hai mujhe sayyād zālim is liye shāyad

ki raunaq us ke gulshan kī mire shaġhl-e-fuġhāñ tak hai

faroġh-e-hasrat-o-ġham se jigar meñ daaġh rakhtā huuñ

mire gulshan kī zīnat daur-e-hañgām-e-ḳhizāñ tak hai

'valī' shāmil nahīñ ho tum abhī rindoñ ke halqe meñ

tumhārī bāda-noshī mahfil-e-pīr-e-muġhāñ tak hai

kahun kya wahshat-e-virana-paimai kahan tak hai

ki wusat mere sahra ki makan se la-makan tak hai

agar chahun nizam-e-dahr ko zer-o-zabar kar dun

mere jazbaat ka tufan zamin se aasman tak hai

tere miTne mein ai dil zindagi ka raaz muzmar hai

hras-e-niyyati aaghaz-e-waqt-e-imtihan tak hai

satata hai mujhe sayyaad zalim is liye shayad

ki raunaq us ke gulshan ki mere shaghl-e-fughan tak hai

farogh-e-hasrat-o-gham se jigar mein dagh rakhta hun

mere gulshan ki zinat daur-e-hangam-e-KHizan tak hai

'wali' shamil nahin ho tum abhi rindon ke halqe mein

tumhaari baada-noshi mahfil-e-pir-e-mughan tak hai