KHum subu saghar surahi jam paimana mera

ḳhum subū sāġhar surāhī jaam paimāna mirā

mere saaqī jab mirā tū hai to mai-ḳhāna mirā

be-niyāzāna tabī.at dil hai shāhāna mirā

bhes to yuuñ dekhne ko hai faqīrāna mirā

har taraf mashq-e-tasavvur se hai naqsha yaar kā

mere haq meñ jannat-ul-māvā hai kāshāna mirā

tum yahāñ kyā aa.e goyā ik ḳhudā.ī aa ga.ī

aaj to ik mahsharistāñ hai jalva-ḳhana mirā

sāz-o-sāmāñ haiñ merī ye be-sar-o-sāmāniyāñ

bāġh-e-jannat se bhī achchhā hai ye vīrāna mirā

ba.ad muddat ke huī hai qadr ab kahte haiñ vo

aaj tak merā hī dīvāna hai dīvāna mirā

dushman apnā aap huuñ maiñ dost apnā aap huuñ

koī duniyā meñ yagāna hai na be-gāna mirā

maiñ ye kahtā huuñ parā.ī-āg meñ girtā hai kaun

sham.a kahtī hai magar aisā hī parvāna mirā

dard-e-dil merā huā hai bā.is-e-ārām-e-yār

niiñd aane ke liye suntā hai afsāna mirā

ai ḳhummār-e-vasl ab to sar uThāne de mujhe

ho gayā taḌkā hilātā hai koī shāna mirā

sher kyā na.ara bhī sun-kar kahte haiñ 'kaifī' hai ye

chhup nahīñ saktā kahīñ andāz-e-mastāna mirā

KHum subu saghar surahi jam paimana mera

mere saqi jab mera tu hai to mai-KHana mera

be-niyazana tabiat dil hai shahana mera

bhes to yun dekhne ko hai faqirana mera

har taraf mashq-e-tasawwur se hai naqsha yar ka

mere haq mein jannat-ul-mawa hai kashana mera

tum yahan kya aae goya ek KHudai aa gai

aaj to ek mahsharistan hai jalwa-KHana mera

saz-o-saman hain meri ye be-sar-o-samaniyan

bagh-e-jannat se bhi achchha hai ye virana mera

baad muddat ke hui hai qadr ab kahte hain wo

aaj tak mera hi diwana hai diwana mera

dushman apna aap hun main dost apna aap hun

koi duniya mein yagana hai na be-gana mera

main ye kahta hun parai-ag mein girta hai kaun

shama kahti hai magar aisa hi parwana mera

dard-e-dil mera hua hai bais-e-aram-e-yar

nind aane ke liye sunta hai afsana mera

ai KHummar-e-wasl ab to sar uThane de mujhe

ho gaya taDka hilata hai koi shana mera

sher kya nara bhi sun-kar kahte hain 'kaifi' hai ye

chhup nahin sakta kahin andaz-e-mastana mera