ab bhi shaida hai zamane ka zamana tera

ab bhī shaidā hai zamāne kā zamāna terā

haaye din sin vo tire uf vo zamāna terā

ek saaqī ke na hone se hai kyā be-lutfī

ki nahīñ rañg vo ai bazm-e-shabāna terā

zid laḌakpan kī ga.ī ab hai javānī kā ġhurūr

na rahā vo na rahegā ye zamāna terā

dil-e-be-tāb sambhal ḳhauf hai rusvā.ī kā

haal dekhe na koī muztaribāna terā

kah de kah de ki ham aa jā.eñge inshā-allāh

go irāda na sahīh mustaqilānā terā

dil churāyā hai mirā kis ne ḳhudā hī jaane

naam letā hai koī be-adbāna terā

maiñ bahī-ḳhvāh jahāñ aur jahāñ merā adū

tū zamāne se ḳhafā aur zamāna terā

hotī haiñ āshiq-o-ma.ashūq meñ jo jo bāteñ

vo kahānī hai mirī yā hai fasāna terā

merī sauteñ aur ik tirī be-parvā.ī

laakh shikve mire aur ek bahāna terā

rañj-o-rāhat ke maze sabko kam-o-besh mileñ

ġhair kā saath mirā haath ho shāna terā

mujh se kuchh kam nahīñ ai ishq tirī rusvā.ī

jis se suniye vo sunātā hai fasāna terā

mujh ko tāḳhīr kā shikva nahīñ haañ aur suno

ā.īna terā hai zulfeñ terī shāna terā

kis se shikva hai shikāyat hai ye kis se 'kaifī'

koī be-gāna yahāñ hai na yagāna terā

ab bhi shaida hai zamane ka zamana tera

haye din sin wo tere uf wo zamana tera

ek saqi ke na hone se hai kya be-lutfi

ki nahin rang wo ai bazm-e-shabana tera

zid laDakpan ki gai ab hai jawani ka ghurur

na raha wo na rahega ye zamana tera

dil-e-be-tab sambhal KHauf hai ruswai ka

haal dekhe na koi muztaribana tera

kah de kah de ki hum aa jaenge insha-allah

go irada na sahih mustaqilana tera

dil churaya hai mera kis ne KHuda hi jaane

nam leta hai koi be-adbana tera

main bahi-KHwah jahan aur jahan mera adu

tu zamane se KHafa aur zamana tera

hoti hain aashiq-o-mashuq mein jo jo baaten

wo kahani hai meri ya hai fasana tera

meri sauten aur ek teri be-parwai

lakh shikwe mere aur ek bahana tera

ranj-o-rahat ke maze sabko kam-o-besh milen

ghair ka sath mera hath ho shana tera

mujh se kuchh kam nahin ai ishq teri ruswai

jis se suniye wo sunata hai fasana tera

mujh ko taKHir ka shikwa nahin han aur suno

aaina tera hai zulfen teri shana tera

kis se shikwa hai shikayat hai ye kis se 'kaifi'

koi be-gana yahan hai na yagana tera