dosti nibh jae un se ibtida aisi to ho

dostī nibh jaa.e un se ibtidā aisī to ho

ibtidā aisī na ho to intihā aisī to ho

ham meñ aur un meñ mohabbat yā ḳhudā aisī to ho

jo sune vo bol uTThe mehr-o-vafā aisī to ho

rahm us be-rahm ko aa jaa.e mujh ko dekh kar

kuchh qusūr aisā to ho koī ḳhatā aisī to ho

vajd meñ hoñ ahl-e-nazāra mile qātil ko daad

kuchh taḌap ai kushta-e-teġh-e-adā aisī to ho

tishna phir jaa.e sikandar aap ḳhud sairāb hoñ

rahnumā.ī vaah kHir-e-rahnumā aisī to ho

vo ye kahte haiñ kaho ab ham na chāheñge tumheñ

jī phaḌak uTThā hamārā bhī jafā aisī to ho

arz-e-matlab par ye shoḳhī ye tabassum dekhnā

ḳhāmushī meñ bazla-sanjī kī adā aisī to ho

bāhamī takrār yā-rab hote hote rah na jaa.e

kuchh maza aa jaa.e aapas meñ zarā aisī to ho

ham marīz-e-hijr nā-haq marte-marte bach ga.e

ab ke aisā to na ho koī davā aisī to ho

mudda.ā donoñ kā hai ma.alūm donoñ ko magar

guftugū se bhī ho vāzeh barmalā aisī to ho

dil kī dil meñ ghuT ke rah jaa.e to phir ik baat hai

aah lab tak bhī na aa.e nā-rasā aisī to ho

baḳhshne vaale ko apnī aisī baḳhshish par ho naaz

yā ilāhal-ālamīn mujh se ḳhatā aisī to ho

tamkanat meñ sādgī iġhmāz meñ sanjīdgī

naaz meñ andāz shoḳhī meñ adā aisī to ho

kūcha-e-qātil meñ mujh ko gher kar laa.ī hai ye

jiite jī jannat meñ pahuñchā de qazā aisī to ho

mai jahāñ uḌtī thī 'kaifī' ab vahāñ uḌtī hai ḳhaak

phir vo din aa.e zamāne kī havā aisī to ho

dosti nibh jae un se ibtida aisi to ho

ibtida aisi na ho to intiha aisi to ho

hum mein aur un mein mohabbat ya KHuda aisi to ho

jo sune wo bol uTThe mehr-o-wafa aisi to ho

rahm us be-rahm ko aa jae mujh ko dekh kar

kuchh qusur aisa to ho koi KHata aisi to ho

wajd mein hon ahl-e-nazara mile qatil ko dad

kuchh taDap ai kushta-e-tegh-e-ada aisi to ho

tishna phir jae sikandar aap KHud sairab hon

rahnumai wah kHir-e-rahnuma aisi to ho

wo ye kahte hain kaho ab hum na chahenge tumhein

ji phaDak uTTha hamara bhi jafa aisi to ho

arz-e-matlab par ye shoKHi ye tabassum dekhna

KHamushi mein bazla-sanji ki ada aisi to ho

bahami takrar ya-rab hote hote rah na jae

kuchh maza aa jae aapas mein zara aisi to ho

hum mariz-e-hijr na-haq marte-marte bach gae

ab ke aisa to na ho koi dawa aisi to ho

muddaa donon ka hai malum donon ko magar

guftugu se bhi ho wazeh barmala aisi to ho

dil ki dil mein ghuT ke rah jae to phir ek baat hai

aah lab tak bhi na aae na-rasa aisi to ho

baKHshne wale ko apni aisi baKHshish par ho naz

ya ilahal-alamin mujh se KHata aisi to ho

tamkanat mein sadgi ighmaz mein sanjidgi

naz mein andaz shoKHi mein ada aisi to ho

kucha-e-qatil mein mujh ko gher kar lai hai ye

jite ji jannat mein pahuncha de qaza aisi to ho

mai jahan uDti thi 'kaifi' ab wahan uDti hai KHak

phir wo din aae zamane ki hawa aisi to ho